ମୋହନା : ଗଜପତି ଜିଲ୍ଲା ମୋହନା ଥାନା ଶୁଖିଲାଆମ୍ବ ଛକରେ କାର ଓ ଅଟୋ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ଅଟୋରେ ଥିବା ୪ ଜଣ ଯାତ୍ରୀ ଆହତ ହୋଇଛନ୍ତି। ଆହତମାନେ ହେଲେ କରଚବାଡ଼ି ପଞ୍ଚାୟତର କୁଟିଗୁଡ଼ା ଗାଁର କୃଷ୍ଣ ଦଳାଇ(୩୮),ମିଲି ଦଳାଇ(୨୮), ଅନନ୍ତ ଦଳାଇ(୩୦) ଓ କଳ୍ପ ଦଳାଇ(୪୦)। ସେମାନଙ୍କ ମଧ୍ୟରୁ କୃଷ୍ଣ, ମିଲି ଓ ଅନନ୍ତଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ମୋହନା ଡ଼ାକ୍ତରଖାନାରେ ପ୍ରାଥମିକ ଚିକିତ୍ସା କରାଯିବା ପରେ ବ୍ରହ୍ମପୁର ସ୍ଥାନାନ୍ତର କରାଯାଇଛି ବୋଲି ଡ଼ାକ୍ତର ଅମୃତରାଜ ଜେନା କହିଛନ୍ତି। ଖବରରୁ ଜଣାପଡ଼ିଛି ଯେ, ଶନିବାର ରାତି ପ୍ରାୟ ୮:୩୦ରେ ଶୁଖିଲାଆମ୍ବ ଛକରେ କୁଟିଗୁଡ଼ା ଗାଁର ଯାତ୍ରୀ ନେଇ ଅଟୋ ଯାଉଥିବା ବେଳେ ଅଡ଼ବା ପଟୁ ଏକ କାର ମୋହନା ଅଭିମୁଖେ ଆସୁଥିଲା। ଏହି ସମୟରେ ଉଭୟଙ୍କ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଫଳରେ ଅଟୋରେ ଥିବା ଯାତ୍ରୀଙ୍କ ମଧ୍ୟରୁ ୪ ଜଣ ଆହତ ହୋଇଥିବା ବେଳେ କାର୍ରେ ଥିବା ମୋହନା ବ୍ଲକ୍ କନିଷ୍ଠଯନ୍ତ୍ରୀ ମହେଶ୍ୱର ମାରାଣ୍ଡି ଆହତ ହୋଇଛନ୍ତି। ଆହତମାନଙ୍କୁ ୧୦୮ ଆମ୍ବୁଲାନ୍ସ୍ ଯୋଗେ ମୋହନା ଡ଼ାକ୍ତରଖାନାକୁ ଅଣାଯାଇଥିବା ବେଳେ ମୋହନା ପୁଲିସ୍ ଘଟଣାର ତଦନ୍ତ କରୁଛି।
