ଡେସ୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀରେ ଓମାନର ସୁଲତାନ ହୈଥମ ବିନ ତାରିକଙ୍କ ସହ ଆଲୋଚନା କରିଛନ୍ତି। ଆଲୋଚନାରେ ପରିବହନ, ବାଣିଜ୍ୟ, ପୁଞ୍ଜି ବିନିଯୋଗ ଏବଂ ଆର୍ଥିକ ପ୍ରଯୁକ୍ତିବିଦ୍ୟା ଭଳି ବିଷୟ ସ୍ଥାନ ପାଇଥିଲା।
ବୈଠକ ପରେ ବୈଦେଶିକ ସଚିବ ବିନୟ ମୋହନ କ୍ୱାତ୍ରା ଗଣମାଧ୍ୟମକୁ କହିଛନ୍ତି ଯେ ଆତଙ୍କବାଦ ସମସ୍ୟାକୁ ନେଇ ଉଭୟ ନେତା ଉଦବେଗ ପ୍ରକାଶ କରିଛନ୍ତି। ଶକ୍ତି ସୁରକ୍ଷା କ୍ଷେତ୍ରରେ ବିଶେଷ କରି ସବୁଜ ଶକ୍ତି କ୍ଷେତ୍ରରେ ମଧ୍ୟ ସେମାନେ ଆଲୋଚନା କରିଥିଲେ। ଦୁଇ ଦେଶ ମଧ୍ୟରେ ଆଲୋଚନା ସୀମିତ ଏବଂ ପ୍ରତିନିଧୀ ସ୍ତରରେ ଅନୁଷ୍ଠିତ ହୋଇଥିଲା ଏବଂ ଦ୍ୱିପାକ୍ଷିକ ସହଯୋଗର ବ୍ୟାପକ କ୍ଷେତ୍ର ଉପରେ ଆଲୋଚନା କରାଯାଇଥିଲା। ବୈଦେଶିକ ସଚିବ କହିଛନ୍ତି ଯେ ଆଲୋଚନାରେ ଭାରତ-ଓମାନ ଦ୍ୱିପାକ୍ଷିକ ସମ୍ପର୍କର ବିଭିନ୍ନ ଦିଗ ପ୍ରତିଫଳିତ ହୋଇଛି। ସେ କହିଛନ୍ତି ଯେ ପଶ୍ଚିମ ଭାରତ ମହାସାଗରରେ ସାମୁଦ୍ରିକ ସୁରକ୍ଷା କ୍ଷେତ୍ରରେ ଭାରତ-ଓମାନ ଅଂଶୀଦାର। ଉଭୟ ପକ୍ଷ ପ୍ରତିରକ୍ଷା କ୍ଷେତ୍ର ଉପରେ ମଧ୍ୟ ଆଲୋଚନା କରିଥିଲେ।
୨୦୨୨-୨୩ ବର୍ଷରେ ଦୁଇ ଦେଶ ମଧ୍ୟରେ ୧୨.୫୦ ବିଲିୟନ ଡଲାରର ବାଣିଜ୍ୟ ହୋଇଛି।
ବୈଠକରେ ଦୁଇ ନେତା ଆଞ୍ଚଳିକ ଏବଂ ଆନ୍ତର୍ଜାତୀୟ ପ୍ରସଙ୍ଗରେ ମତ ବିନିମୟ କରିଥିଲେ। ଭବିଷ୍ୟତ ପାଇଁ ପାର୍ଟନରସିପ୍ ଅଫ୍ ଇଣ୍ଡିଆ-ଓମାନ ମିଳିତ ଭିଜନ୍ ଡକ୍ୟୁମେଣ୍ଟ୍ ଉଭୟ ସ୍ୱୀକାର କରିଛନ୍ତି। ଏହି ଭିଜନ ପେପର ଆଠରୁ ଦଶଟି କ୍ଷେତ୍ରରେ ଭାଗିଦାରୀ ନିର୍ମାଣ ଉପରେ କେନ୍ଦ୍ରିତ ରହିବ। ଏହି କ୍ଷେତ୍ରଗୁଡିକ ସାମୁଦ୍ରିକ ସହଯୋଗ ଏବଂ ସଂଯୋଗ, ଶକ୍ତି ସୁରକ୍ଷା, ଡିଜିଟାଲ୍ ଦେୟ, ସ୍ୱାସ୍ଥ୍ୟ ସେବା, ପର୍ଯ୍ୟଟନ, ଆତିଥ୍ୟ, କୃଷି ଏବଂ ଖାଦ୍ୟ ନିରାପତ୍ତା ଅନ୍ତର୍ଭୁକ୍ତ।
ଓମାନର ସୁଲତାନ ଗତକାଲି ତିନି ଦିନିଆ ଗସ୍ତରେ ଭାରତରେ ପହଞ୍ଚିଛନ୍ତି। ବରିଷ୍ଠ ମନ୍ତ୍ରୀ ଏବଂ ଅଧିକାରୀମାନଙ୍କୁ ନେଇ ଏକ ଉଚ୍ଚସ୍ଥରୀୟ ପ୍ରତିନିଧି ଦଳ ମଧ୍ୟ ଆସିଛନ୍ତି। ଆଜି ସକାଳେ ରାଷ୍ଟ୍ରପତି ଭବନରେ ସୁଲତାନଙ୍କୁ ସ୍ୱାଗତ କରାଯାଇଥିଲା।
