ତ୍ରୁଟିପୂର୍ଣ୍ଣ ଚୁଟି କଟା ପାଇଁ ୨କୋଟି ତଣ୍ଡ

ନୂଆଦିଲ୍ଲୀ : ଜଣେ ମହିଳାଙ୍କର ଚୁଟି କାଟିବାରେ ତ୍ରୁଟି ପାଇଁ ଦିଲ୍ଲୀର ପଞ୍ଚତାରକା ହୋଟେଲ ଆଇଟିସି ମୌର୍ଯ୍ୟ ଉପରେ ୨କୋଟି ଟଙ୍କା କ୍ଷତିପୂରଣ ଧାର୍ଯ୍ୟ କରାଯାଇଛି। ଜାତୀୟ ଗ୍ରାହକ ବିବାଦ ସମାଧାନ ଆୟୋଗ (ଏନସିଡିଆରସି) ହୋଟେଲ ଉପରେ ଏହି କ୍ଷତିପୂରଣ ଧାର୍ଯ୍ୟ କରିଛନ୍ତି। କ୍ଷତିପୂରଣ ଅର୍ଥ ସମ୍ପୃକ୍ତ ମହିଳା ଗ୍ରାହକଙ୍କୁ ଦେବାକୁ ଆୟୋଗ ନିର୍ଦେଶ ଦେଇଛନ୍ତି। ହୋଟେଲ କର୍ମଚାରୀ (ହେୟାର ଡିଜାଇନର)ଙ୍କ ଅବହେଳା ଯୋଗୁଁ ଚୁଟି କାଟିବା ସମୟରେ ଅହନା ରାୟ ନାମକ ମହିଳାଙ୍କ ମୁଣ୍ଡର ଚର୍ମ ପୋଡି ଯାଇଥିଲା। ଅହନା ବୃତ୍ତିରେ ଜଣେ ମଡେଲ ଓ ଯୋଗାଯୋଗ କର୍ମଚାରୀ। ଚର୍ମ ପୋଡି ଯିବା ପରେ ଏହା ଆଲର୍ଜି ହୋଇଯାଇଥିଲା। ଏହାକୁ ନେଇ ସେ ମାନସିକ ଭାରସାମ୍ୟ ହରାଇବା ସହିତ ନିଜର ବୃତ୍ତି ଓ ରୋଜଗାର ହରାଇଥିଲେ। ଏପରିକି ସେ ସାମାଜିକ କାର୍ଯ୍ୟକ୍ରମରୁ ଦୂରେଇ ରହିବାକୁ ବାଧ୍ୟ​‌ ହୋଇଥିଲେ। ଅହନା ନିଜର ଲମ୍ବା ଚୁଟି ପାଇଁ ବିଭିନ୍ନ କମ୍ପାନୀ ପାଇଁ ବିଜ୍ଞାପନ କରିଥାନ୍ତି। ଏହି ଘଟଣାକୁ ନେଇ ଅହନା ଏନସିଡିଆରସିଙ୍କ ଦ୍ବାରସ୍ଥ ହୋଇଥିଲେ। ଏନସିଡିଆରସି ଅଧ୍ୟକ୍ଷ ବିଚାରପତି ଆରକେ ଅଗ୍ରୱାଲଙ୍କ ନେତୃତ୍ବ ପୀଠ ଏହାର ବିଚାର କରି ହୋଟେଲ କର୍ତ୍ତୃପକ୍ଷଙ୍କୁ ଦୋଷୀ ଦର୍ଶାଇବା ପୂର୍ବକ ୨କୋଟି ଟଙ୍କା କ୍ଷତିପୂରଣ ନିର୍ଦେଶ ଦେଇଛନ୍ତି। ଅହନାଙ୍କ ଚିକିତ୍ସା ଖର୍ଚ୍ଚ ବହନ କରିବାକୁ ମଧ୍ୟ ହୋଟେଲକୁ କୁହାଯାଇଛି।