ଭୁବନେଶ୍ୱର : ହକି ବିଶ୍ୱକପ ପୂର୍ବରୁ ଜନସାଧାରଣଙ୍କ ଯିବା ଆସିବା ସୁବିଧା ପାଇଁ ରାଜ୍ୟ ସରକାର “ମୋ ବସ” କାର୍ଯ୍ୟକ୍ରମ ହାତକୁ ନେଇଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୂର୍ବାହ୍ନ ୧୧ଟା ସମୟରେ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦର ଛକରେ ଏହାକୁ ଶୁଭାରମ୍ଭ କରିଛନ୍ତି। “ମୋ ବସ” ସେବାରେ ୫୦% ପ୍ରତିଶତ ସଂରକ୍ଷଣ ବ୍ୟବସ୍ଥା ମହିଳାମାନଙ୍କ ପାଇଁ କରାଯାଇଛି। ଏହି ନୂତନ ବସରେ ଲାଗିଥିବା ସିସି କ୍ୟାମେରା ଦ୍ୱାରା ମହିଳାମାନେ ଅଧିକ ଉପକୃତ ହେବେ ବୋଲି ଆଶା ରଖାଯାଇଛି।
ସୂଚନାଯୋଗ୍ୟ ଯେ, ନୂତନ ବୈଷୟିକ ଜ୍ଞାନକୌଶଳରେ ନିର୍ମିତ ହୋଇଥିବା ଏହି ବସ ଗୁଡିକ ଯାତ୍ରୀମାନଙ୍କୁ କଟକ, ଭୁବନେଶ୍ୱର ଓ ପୁରୀକୁ ସେବା ଯୋଗାଇ ଦେବ। ମୋଟ୍ ୨୦୦ଟି ବସ ଯାତ୍ରା କରିବା ନେଇ ଯୋଜନା କରାଯାଇଥିଲେ ମଧ୍ୟ ପ୍ରଥମ ପର୍ଯ୍ୟାୟରେ ୮ଟି ରୁଟରେ ୧୦୦ଟି ବସ ଚଳାଚଳ କରିବ। ପ୍ରତି ୧୦ମିନିଟରେ ଏହି ବସ ଯାତ୍ରା କରିବ। ସକାଳ ୭ଟାରୁ ରାତି ୧୦ଟା ପର୍ଯ୍ୟନ୍ତ ବସ ଚଳାଚଳ କରିବ। ଏହି ବସଗୁଡିକରେ ଯାତ୍ରୀମାନଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ବସରେ ସିସି କ୍ୟାମେରା, ଅଟୋମେଟିକ ସେନସର, ୱାଇଫାଇ ସେବାର ବ୍ୟବସ୍ଥା ରହିଛି। ତେବେ ସିଟି ବସ ବଦଳରେ ଏହି ବସଗୁଡିକ ଚଳାଚଳ କରିବା ଫଳରେ ଯାତ୍ରୀମାନେ ଉପକୃତ ହେବେ ବୋଲି ଆଶା କରାଯାଇଛି।
