କଶ୍ମୀର: ଆତଙ୍କବାଦୀ ହମ୍ଲାରେ ଜଣେ ଯବାନ୍ଙ୍କ ସମେତ ଦୁଇଜଣ ନାଗରିକଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଜଣେ ୧୬ ବର୍ଷର ନାବାଳକ ଅଛନ୍ତି। ମୃତ ଯବାନ ସଦା ଜି ରାଓ ଏବଂ ମୃତକ ଦୁଇ ନାଗରିକ କୁଲଗାମ୍ ଜିଲାର ଅହମ୍ମଦ ଶେଖ୍ ଓ ଅନନ୍ତନାଗ ଜିଲାର ଅହମ୍ମଦ ତନ୍ତ୍ରେ ବୋଲି ଜଣାପଡ଼ିଛି। ଖୁଡୱାନି ଅଞ୍ଚଳରେ ଆତଙ୍କବାଦୀ ଥିବା ଜଣାପଡ଼ିବା ପରେ ଯବାନମାନେ ତଲାସୀ ଅଭିଯାନ ଆରମ୍ଭ କରିଥିଲେ। ଏହି ସମୟରେ ଯବାନ୍ ଓ ଆତଙ୍କବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ସ୍ଥାନୀୟ ଲୋକେ ଯବାନଙ୍କୁ ବିରୋଧ କରି ପଥର ମାଡ଼ କରିଥିବା ବେଳେ ସେମାନଙ୍କୁ ଘଉଡ଼ାଇବା ପାଇଁ ଯବାନମାନେ ପିଲେଟ୍ ଗୁଳି ଚାଳନା କରିଥିଲେ। ଏଥିରେ ୭୦ ଜଣ ଆହତ ହୋଇଛନ୍ତି। ଏହି ଘଟଣା ପରେ ଦୋକାନ ବଜାର ଓ ଶିକ୍ଷାନୁଷ୍ଠାନ ବନ୍ଦ ରହିଛି।
