ମାଲକାନଗିରି: ପଡ଼ିଆ ବ୍ଲକ କମାରଗୁଡ଼ା ଗାଁ ଜଙ୍ଗଲରୁ ୫ ବୋମା ଠାବ କରାଯାଇଛି। ଏକ ଗଛମୂଳେ ପଡ଼ିଥିବା ୫ ଜିଲାଟିନ ବୋମା ଠାବ କରିଛି ବିଏସଏଫ। ଯବାନମାନେ ପାଟ୍ରୋଲିଂ କରୁଥିଲାବେଳେ ମେଟାଲ ଡିଟେକ୍ଟର ଯୋଗେ ବୋମା ପାଇଛନ୍ତି। ସ୍ବତନ୍ତ୍ର ଟିମ ପକ୍ଷରୁ ଠାବ କରାଯାଇଥିବା ବୋମାଗୁଡ଼ିକୁ ନିଷ୍କ୍ରିୟ କରାଯାଇଛି।
ମିିଳିଥିବା ସୂଚନା ଅନୁଯାୟୀ ମାଲକାନଗିରି ଜିଲା ସୀମାବର୍ତ୍ତୀ ପଡ଼ିଆ ବ୍ଲକ ମାଟେରୁ ପଞ୍ଚାୟତ ଅନ୍ତର୍ଗତ କମାରଗୁଡ଼ା ଗ୍ରାମ ଜଙ୍ଗଲରେ ବିଏସଏଫ ଯବାନମାନେ ପାଟ୍ରୋଲିଂ କରୁଥିବାବେଳେ ଏକ ଗଛ ମୂଳରୁ ୫ଟି ଜିଲେଟିନ ବୋମା ଠାବ କରିଛନ୍ତି ଏବଂ ପରବର୍ତ୍ତୀ ସମୟରେ ସେଗୁଡ଼ିକୁ ନିଷ୍କ୍ରିୟ କରିଛନ୍ତି।
ପଡ଼ିଆ ସ୍ଥିତ ୧୪୨ ବାଟାଲିଅନ୍ ବିଏସ୍ଏଫ୍ ଯବାନମାନେ ଦୁର୍ଗମ ମାଟେରୁ ପଞ୍ଚାୟତର ପର୍ସନପଲ୍ଲୀ ଲିଙ୍କ୍ ରୋଡ୍ ଠାରୁ ଅଢ଼େଇ କିମି ଦୂରରେ ଥିବା କମାରଗୁଡ଼ା ଜଙ୍ଗଲରେ ପାଟ୍ରୋଲିଂ କରୁଥିବା ବେଳେ ଏକ ଗଛ ମୂଳରେ ୫ଟି ବୋମା ରଖାଯାଇଥିବା ଜାଣିବାକୁ ପାଇଥିଲେ। ମେଟାଲ ଡିଟେକ୍ଟର ସାହାଯ୍ୟରେ ସେମାନେ ବୋମା ଗୁଡ଼ିକୁ ଠାବ କରିଥିଲେ ଏବଂ ଏକ ସ୍ବତନ୍ତ୍ର ଟିମ ସହାୟତାରେ ସମସ୍ତ ବୋମା ନିଷ୍କ୍ରିୟ କରିଥିଲେ।
