ବୌଦ୍ଧ : ଗତ ଏକ ସପ୍ତାହ ତଳେ ବୌଦ୍ଧଜିଲା ବାଉଁଶୁଣୀ ଥାନା ଅନ୍ତର୍ଗତ ମଲିକପଡା ଗ୍ରାମରେ କନେଷ୍ଠବଳ ସନ୍ତୋଷ ଜାନୀଙ୍କୁ ତାଙ୍କର ଦୁଇ ବଡଭାଇ ଅତ୍ୟନ୍ତ ନୃସଂସ ଭାବରେ ହତ୍ୟା କରିଥିଲେ। ସନ୍ତୋଷଙ୍କୁ ମାଡ ମାରିବା ସହ ବେହୋସ ଅବସ୍ଥାରେ ଜିଅନ୍ତା ପୋଡି ଫେରାର ହୋଇଯିବା ଘଟଣାକୁ ନେଇ ଜିଲା ପୁଲିସ ବିଭାଗ ସ୍ତବ୍ଧ ହୋଇଯିବା ସହ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି ହୋଇଥିଲା। ପୁଲିସ ବିଭାଗ ଓ ଥାନା ଅଧିକାରୀଙ୍କ ତତ୍ପରତା ଯୋଗୁଁ ହତ୍ୟାକାରୀମାନଙ୍କୁ ଦୁଇଦିନ ମଧ୍ୟରେ ଗିରଫ କରାଯାଇପାରିଥିଲା। ଏହି ହତ୍ୟାକାଣ୍ଡ ଘଟଣା ପାରିବାରିକ କଳହରୁ ଘଟିଥିବା ପ୍ରାରମ୍ଭିକ ତଦନ୍ତରେ ଜଣାପଡିଥିବାବେଳେ କଳହର କାରଣକୁ ନେଇ ପୁଲିସର ତଦନ୍ତ ଛିଣ୍ଡୁ ନ ଥିବା ଜଣାଯାଇଛି। ଦୁଇ ହତ୍ୟାକାରୀ ଭାଇଙ୍କ ମଧ୍ୟରେ ଜଣେ ପୂର୍ବରୁ ଅନ୍ୟ ଏକ ହତ୍ୟାକଣ୍ଡ ମାମଲାରେ ଦୀର୍ଘଦିନ ଜେଲରେ ରହି ବେଲରେ ଫେରିଥିବାବେଳେ ଅନ୍ୟ ଭାଇଜଣଙ୍କ ସାନଭାଇ ହତ୍ୟାକାଣ୍ଡକୁ ନେଇ ବହୁତ ଅନୁତପ୍ତ ଥିବା ତଦନ୍ତ ସମୟରେ ପ୍ରକାଶ କରିଥିଲା। ତେବେ ଚାକିରିଆ ସାନଭାଇ ନିଜ ପତ୍ନୀ ଓ ପୁଅଠାରୁ ଦୂରରେ ରହି ବାରମ୍ବାର ପରିବାର ଉପରେ ବୋଝ ପାଲଟୁଥିବାରୁ ଏବଂ ଘଟଣାଦିନ ଅତ୍ୟଧିକ ମଦ୍ୟପାନ କରି ଘରକୁ ଫେରି ଭାଇମାନଙ୍କ ସହ ବଚସା ଯୋଗୁଁ ଏହି ହତ୍ୟାକାଣ୍ଡ ଘଟିଥିବା ନେଇ ପରିବାରଲୋକ ସୂଚନା ଦେଉଥିବାବେଳେ ପୁଲିସର ତଦନ୍ତ କିନ୍ତୁ ଛିଣ୍ଡୁ ନ ଥିବା ଜଣାଯାଇଛି। ଏକ ନୃସଂଶ ହତ୍ୟାକାଣ୍ଡ ପଛରେ ସାମାନ୍ୟ କାରଣକୁ ପୁଲିସ ସହଜରେ ଗ୍ରହଣ କରୁନଥିବାବେଳେ ହତ୍ୟାକାଣ୍ଡର ପ୍ରକୃତ କାରଣ ଖୋଜୁଥିବା ଜଣାଯାଇଛି। ଶବ ବ୍ୟବଚ୍ଛେଦ ରିପୋର୍ଟ ପହଞ୍ଚିବା ପରେ ହତ୍ୟାକାଣ୍ଡ ସଂପର୍କରେ ଅନେକ ତଥ୍ୟ ସ୍ପଷ୍ଟ ହୋଇପାରିବ ବୋଲି ପୁଲିସ ଆଶାବାଦୀ ରହିଛି।
Comments are closed.