ରାଞ୍ଚି: ବାହାନଗା ରେଳ ଦୁର୍ଘଟଣାର ଭୟାବହତା ଲୋକଙ୍କ ମନରୁ ଲିଭି ନଥିବା ବେଳେ ଏବେ ଅଳ୍ପକେ ଟଳିଛି ଆଉ ଏକ ରେଳ ଦୁର୍ଘଟଣା। ଝାଡ଼ଖଣ୍ଡର ବୋକାରୋ ଜିଲାରେ ମଙ୍ଗଳବାର ସନ୍ଧ୍ୟାରେ ନୂଆଦିଲ୍ଲୀ-ଭୁବନେଶ୍ବର ରାଜଧାନୀ ଏକ୍ସପ୍ରେସ(ଟ୍ରେନ୍ ସଂଖ୍ୟା ୨୨୮୧୨) ଏକ ବଡ଼ ଧରଣର ଦୁର୍ଘଟଣାରୁ ରକ୍ଷା ପାଇଛି। ରେଳ ଅଧିକାରୀଙ୍କ କହିବାନୁଯାୟୀ, ଭୋଜୁଡିହ ରେଳ ଷ୍ଟେସନ ନିକଟ ସନ୍ଥାଲଡିହ ରେଳ କ୍ରସିଂରେ ଏକ ଟ୍ରାକ୍ଟର ରେଳ ଧାରଣା ଏବଂ ଫାଟକ ମଝିରେ ଫସି ରହିଥିଲା। ଠିକ୍ ଏହି ସମୟରେ ସେହି ରେଳ ପଥରେ ଆସିଥିଲା ରାଜଧାନୀ ଏକ୍ସପ୍ରେସ। କିନ୍ତୁ ଲୋକୋପାଇଲଟ୍ଙ୍କ ଉପସ୍ଥିତ ବୁଦ୍ଧି ଯୋଗୁ ଏକ ବଡ଼ ଦୁର୍ଘଟଣା ଟଳିଯାଇଛି।
ଦକ୍ଷିଣ ପୂର୍ବାଞ୍ଚଳ ରେଳବାଇ (ଆଡ୍ରା ଡିଭିଜନ୍) ଡିଆରଏମ୍ ମନୀଷ କୁମାର ଗଣମାଧ୍ୟମକୁ କହିଛନ୍ତି ଯେ, ବୋକାରୋ ଜିଲ୍ଲାର ଭୋଜୁଡିହ ରେଳ ଷ୍ଟେସନ ନିକଟ ସନ୍ଥାଲଡିହ ରେଳ କ୍ରସିଂରେ ଏକ ଟ୍ରାକ୍ଟର ରେଳ ଧାରଣା ଏବଂ ଫାଟକ ମଧ୍ୟରେ ଫସି ଯାଇଥିଲା। ମାତ୍ର ଲୋକୋପାଇଲଟ୍ ଉଚିତ ସମୟରେ ବ୍ରେକ୍ ଲଗାଇଥିଲେ ଓ ଟ୍ରେନ ଅଟକି ଯାଇଥିଲା। ଫଳରେ ଏକ ବଡ଼ ଦୁର୍ଘଟଣା ଟଳି ଯାଇଥିଲା। ଅପରପକ୍ଷେ, ଟ୍ରାକ୍ଟର ଚାଳକ ଘଟଣାସ୍ଥଳରୁ ଫେରାର ହୋଇଯାଇଥିଲା।
ମନୀଷ କୁମାର କହିଛନ୍ତି, ଏହି ଘଟଣା ସନ୍ଧ୍ୟା ପ୍ରାୟ ୫ଟା ସମୟରେ ଘଟିଥିଲା ଏବଂ ଏହି କାରଣରୁ ଟ୍ରେନ୍ ୪୫ ମିନିଟ୍ ପର୍ଯ୍ୟନ୍ତ ଅଟକି ରହିଥିଲା। ଟ୍ରାକ୍ଟରକୁ ଜବତ କରାଯାଇଛି ଓ ସମ୍ପୃକ୍ତ ଥାନାରେ ଏତଲା ଦିଆଯାଇଛି। ଏଥିସହ ଗେଟ୍ ମ୍ୟାନ୍ଙ୍କୁ ନିଲମ୍ବିତ କରାଯାଇଥିବା ସେ କହିଛନ୍ତି।
