ପୁରୀ : ବର୍ଦ୍ଧମାନ ରାଜକୁମାର ଆଦିତ୍ୟଙ୍କ ହାତ ଧରିଛନ୍ତି ପୁରୀ ରାଜକୁମାରୀ ଦେବେଶୀ। ଗଜପତି ମହାରାଜା ଦିବ୍ୟସିଂହ ଦେବଙ୍କ ଚତୁର୍ଥ କନ୍ୟା ଦେବେଶୀଙ୍କ ବିବାହ ବୁଧବାର ରାଜକୀୟ ରୀତିନୀତି ଅନୁଯାୟୀ ଭୁବନେଶ୍ବରର ଏକ ତାରକା ହୋଟେଲରେ ଅନୁଷ୍ଠିତ ହୋଇଛି। ବରଯାତ୍ରୀଙ୍କୁ ଶୁଦ୍ଧ ଶାକାହାରୀ ଓଡ଼ିଆ ଖାଦ୍ୟରେ ଆପ୍ୟାୟିତ କରିଛନ୍ତି ଗଜପତି ମହାରାଜା। କୋଭିଡ କଟକଣା ସହ ସୀମିତ ସଂଖ୍ୟକ ନିମନ୍ତ୍ରିତ ଅତିଥିଙ୍କୁ ନେଇ ବର୍ଣ୍ଣାଢ୍ୟ ବିବାହ ଉତ୍ସବ ଅନୁଷ୍ଠିତ ହୋଇଛି। ସେଥିରେ ଢେଙ୍କାନାଳ ରାଜା କାମାକ୍ଷା ପ୍ରସାଦ ସିଂହଦେଓ, ପାଟଣାଗଡ ରାଜା କନକ ବର୍ଦ୍ଧନ ସିଂହଦେଓ, ଆଳି ରାଜା ପ୍ରତାପ ଦେଓ, କଳାହାଣ୍ଡି ରାଜା ଅର୍କେଶ ଦେଓ, ଦେବଗଡ ବାମଣ୍ଡା ରାଜା ନୀତୀଶ ଗଙ୍ଗଦେବ ଏବଂ ଖଣ୍ଡପଡା ରାଜା ସିଦ୍ଧାର୍ଥ ଶେଖର ମର୍ଦ୍ଦରାଜ ଯୋଗ ଦେଇଥିଲେ।
ଶଙ୍ଖ, ମହୁରୀ ଏବଂ ବୀରବାଦ୍ୟ ସହ ସନ୍ଧ୍ୟାରେ ଶୋଭାଯାତ୍ରାରେ ପହଞ୍ଚିଥିଲେ ବର୍ଦ୍ଧମାନ ରାଜକୁମାର ଆଦିତ୍ୟ କେହେର। କନ୍ୟାପିତା ଗଜପତି ମହାରାଜା ଶ୍ରୀଦିବ୍ୟସିଂହ ଦେବ ଫୁଲ ଓ ଚନ୍ଦନ ଦେଇ ଜ୍ବାଇଁ ବରଣ କରିଥିଲେ। ରାତିରେ ବିବାହ ଉତ୍ସବ ଅନୁଷ୍ଠିତ ହୋଇଛି। ପୁରୀର ପାରମ୍ପରିକ ନାଗା, ମେଢ ଏବଂ ରାବଣ ନୃତ୍ୟ ସମେତ ଗୋଟିପୁଅ ଏବଂ ବନାଟି ପରିବେଷଣ କରାଯାଇଥିଲା। ଏହିସବୁ ନୃତ୍ୟ ଦେଖି ବରଯାତ୍ରୀ ବିଭୋର ହୋଇଥିଲେ।
ବିବାହ ପୂର୍ବରୁ ଗଜପତିଙ୍କ ଦ୍ବାରା ଅଧିବାସ, ପଞ୍ଚକର୍ମ ଏବଂ ଗୌରୀପୂଜା କରାଯାଇଥିଲା। ତିନିଦିନ ଧରି ଭୁବନେଶ୍ବରର ତାରକା ହୋଟେଲରେ ରାଜକୁମାରୀଙ୍କ ହଳଦୀ ଏବଂ ମେହେନ୍ଦି ସମେତ ସଙ୍ଗୀତ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବୁଧବାର ବିବାହ ଶେଷହେବା ପରେ ଗଜପତି ମହାରାଜା ଶ୍ରୀଦିବ୍ୟସିଂହ ଦେବ ଏବଂ ମହାରାଣୀ ଝିଅଜ୍ବାଇଁଙ୍କୁ ଆଶୀର୍ବାଦ କରିବା ସହ ବିଦାୟ ଦେଇଛନ୍ତି।
ପୁରୀ ଶ୍ରୀନଅରରେ ରାତିରେ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ, ଛତିଶା ନିଯୋଗ କର୍ମକର୍ତ୍ତା ଏବଂ ବରିଷ୍ଠ ସେବାୟତଙ୍କୁ ମହାପ୍ରସାଦରେ ଆପ୍ୟାୟିତ କରାଯାଇଛି। ଗଜପତି ମହାରାଜାଙ୍କ ଚତୁର୍ଥ କନ୍ୟା ଦେବେଶୀ ଜଣେ ଉଚ୍ଚଶିକ୍ଷିତା ଏବଂ ଜ୍ବାଇଁ ଆଦିତ୍ୟଙ୍କର ବଡ଼ ବ୍ୟବସାୟ ରହିଥିବା ଜଣାପଡିଛି। ଆଦିତ୍ୟଙ୍କ ଘର ହରିୟାଣା ଗୁରୁଗ୍ରାମରେ ବୋଲି ଜଣାପଡିଛି। ତାଙ୍କ ପିତାଙ୍କ ନାମ ରାଜୀବ କେହେର। କରୋନା କଟକଣା ଯୋଗୁଁ କୌଣସି ମନ୍ତ୍ରୀ କିମ୍ବା ବରିଷ୍ଠ ଅଧିକାରୀଙ୍କୁ ରାଜକୁମାରୀଙ୍କ ବିବାହକୁ ନିମନ୍ତ୍ରଣ କରାଯାଇ ନଥିଲା। ରାଜକୁମାରୀ ଦେବେଶୀଙ୍କ ବିବାହ ଉତ୍ସବରେ ଯୋଗ ଦେବାକୁ ଆସିଥିବା ଅତିଥିମାନେ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କୁ ଦର୍ଶନ କରିଥିଲେ।
