ବେଗୁନିଆ: ବାଘମାରୀ ଥାନା ଅନ୍ତର୍ଗତ ବାଘମାରୀ ତଳସାହି ନିକଟରେ ଗୁରୁବାର ରାତି ୧୧ଟାରେ ଜଣେ ବ୍ୟବସାୟୀଙ୍କୁ ଗୁଳି କରି ଦୁର୍ବୃତ୍ତମାନେ ୮୦ ହଜାର ଟଙ୍କା ଲୁଟି ନେଇ ଫେରାର ହୋଇଯାଇଛନ୍ତି । ବାଘମାରୀ ବ୍ରାହ୍ମଣସାହିର ମନୋରଞ୍ଜନ ସାମନ୍ତରାୟ ବାଘମାରୀ ପଞ୍ଚାୟତ କାର୍ୟ୍ୟାଳୟ ନିକଟରେ ଏକ ତେଜରାତି ଦୋକାନ କରିଥିବାବେଳେ ଗତକାଲି ରାତି ୧୧ ଟା ସମୟରେ ଦୋକାନ ବନ୍ଦ କରି ଟଙ୍କା ଧରି ବାଇକରେ ଘରକୁ ଫେରୁଥିଲେ । ସେହିସମୟରେ ୩ ଜଣ ଦୁର୍ବୃତ୍ତ ଏକ ପଲସର ବାଇକରେ ତାଙ୍କୁ ପିଛା କରି ସ୍କୁଲ ନିକଟରେ ତାଙ୍କ ଆଗକୁ ଆସି ତାଙ୍କୁ ଅଟକାଇଥିଲେ । ମନୋରଞ୍ଜନ ସେମାନଙ୍କୁ ଦେଖି ଭୟରେ ବାଇକଟିକୁ ଛାଡି ଟଙ୍କା ବ୍ୟାଗ ଧରି ସେଠାରୁ ଦୌଡ଼ି ପଳାଇବା ସମୟରେ ଦୁର୍ବୃତ୍ତମାନେ ତାଙ୍କୁ ଗୁଳି ମାଡ କରିଥିଲେ। ଗୁଳିଟି ତାଙ୍କର ଡାହାଣ ଗୋଡ ଆଣ୍ଠୁ ତଳକୁ ବାଜି ଥିଲା । ଫଳରେ ସେ ତଳେ ପଡି ଯାଇଥିଲେ । ସଙ୍ଗେ ସଙ୍ଗେ ଦୁର୍ବୃତ୍ତମାନେ ତାଙ୍କଠାରୁ ଟଙ୍କା ଲୁଟି ନେଇ ଘଟଣାସ୍ଥଳରୁ ଫେରାର ହୋଇଯାଇଥିଲେ ।
ଖବରପାଇ ବାଘମାରୀ ଥାନା ଅଧିକାରିଣୀ ଅର୍ଚ୍ଚନା ମଲ୍ଲିକ କର୍ମଚାରୀମାନଙ୍କ ସହିତ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରି ଖୋର୍ଦ୍ଧା ମେଡ଼ିକାଲ ପଠାଇଥିଲେ । ସେଠାରୁ ତାଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଥିଲା । ବର୍ତ୍ତମାନ ସେ ସମ୍ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ତାଙ୍କ ଗୋଡ଼ରୁ ଗୁଳିଟି ବାହାର କରାଯାଇଛି । ଥାନା ଅଧିକାରିଣୀ ଅର୍ଚ୍ଚନା ମଲ୍ଲିକ ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ କରି ୩ ଜଣ ଦୁର୍ବୃତ୍ତ ଏକ ପଲସର ବାଇକରେ ଯାଉଥିବାର ଜାଣିପାରିଥିବା ବେଳେ ବାଇକ ନମ୍ବର ଜଣାପଡୁନାହିଁ ବୋଲି କହିଛନ୍ତି । ଥାନା ଅଧିକାରିଣୀଙ୍କ ସହାୟତାରେ ଭୁବନେଶ୍ୱରରୁ ଆସିଥିବା ସାଇଣ୍ଟିଫିକ ଟିମ ଘଟଣାସ୍ଥଳକୁ ଯାଇ ଘଟଣାର ତଦନ୍ତ କରି ଫେରିଯାଇଛନ୍ତି । ପୋଲିସ ଘଟଣାସ୍ଥଳରୁ ଗୋଟିଏ ଖୋକା, ଚପଲ ଏବଂ ବାଇକ ସହିତ ଦୁର୍ବୃତ୍ତମାନେ ଆଣି ଆସିଥିବା ପଲସର ବାଇକର ଏକ ଭଙ୍ଗା ଇଣ୍ଡିକେଟରକୁ ଜବତ କରିଛି । ଥାନା ଅଧିକାରିଣୀ ଶ୍ରୀମତୀ ମଲ୍ଲିକ ଏହି ଘଟଣାରେ କେହି ପ୍ରତ୍ୟକ୍ଷଦର୍ଶୀ ନଥିବା ଯୋଗୁଁ ଲୋକମାନଙ୍କୁ ପଚରାଉଚରା କରି ଥାନାରେ ୫୫/୨୧ ନଂ କେଶ ରୁଜୁ କରି ନିଜେ ଘଟଣାର ତଦନ୍ତ କରୁଛନ୍ତି ।
Comments are closed.