ଭୁବନେଶ୍ୱର: ରାଜ୍ୟର ସବୁଠାରୁ ବଡ ଶୈବ ପୀଠ ଲିଙ୍ଗରାଜ ମନ୍ଦିର ବିପଦଶଙ୍କୁଳ ଅବସ୍ଥାରେ ରହିଛି । ରକ୍ଷଣାବେକ୍ଷଣରେ ଅବେହଳା ଯୋଗୁଁ ଲିଙ୍ଗରାଜ ମନ୍ଦିରରେ ଫାଟ ସୃଷ୍ଟି ହୋଇଥିବା ଅଭିଯୋଗ ହୋଇଛି । ଏନେଇ ଗୁରୁବାର ଦେବୋତ୍ତର କମିଶନର ଚିତ୍ତରଞ୍ଜନ ମହାପାତ୍ର ଏଏସ୍ଆଇ ଡିଜିଙ୍କୁ ଚିଠି କରିଛନ୍ତି ।
ଚିଠିରେ ସେ ଉଲ୍ଲେଖ କରିଛନ୍ତି ଯେ, ଲିଙ୍ଗରାଜ ମନ୍ଦିର ପରିସରରେ ଥିବା ମୁଖ୍ୟମନ୍ଦିର ଦଧିନଉତିରେ ଏକାଧିକ ଫାଟ ଦେଖିବାକୁ ମିଳିଛି। ବର୍ଷା ଦିନେ ସେଠାରୁ ପାଣି ଗଳିବା ସହ ମୁଖ୍ୟ ମନ୍ଦିରରୁ ପଥର ଖସିବା ନେଇ ଆଶଙ୍କା କରାଯାଉଛି । କେବଳ ସେତିକି ନୁହେଁ ଗର୍ଭଗୃହର ଚଟାଣ ମଧ୍ୟ ନଷ୍ଟ ହୋଇଯାଇଛି । ଏହା ସହ ମନ୍ଦିର ପ୍ରାଙ୍ଗଣରେ ଥିବା ଅନ୍ୟ ଦେବାଦେବୀ ମନ୍ଦିରରୁ ମଧ୍ୟ ପାଣି ଗଳୁଥିବା ଦେଖିବାକୁ ମିଳିଛି । ମୁଖ୍ୟମନ୍ଦିର ସମେତ ଜଗମୋହନ, ପାର୍ବତୀ ମନ୍ଦିର, ଗଣେଶ ମନ୍ଦିର, ରୋଷଘର, ଭୋଗମଣ୍ଡପ, ବିଶ୍ୱକର୍ମା ମନ୍ଦିର, ଭୁବନେଶ୍ୱରୀ ମନ୍ଦିର, ଏକାମ୍ରେଶ୍ୱର ମନ୍ଦିର, ଉଗ୍ରେଶ୍ୱର ମନ୍ଦିରରେ ଶୀଘ୍ର ମରାମତି ପାଇଁ ଦେବୋତ୍ତର କମିଶନର ଏଏସ୍ଆଇଙ୍କୁ ଚିଠିରେ ଅନୁରୋଧ କରିଛନ୍ତି ।
