ଲାଞ୍ଜିଗଡ: କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଳକ ନିୟମଗିରି ପାହାଡ ଶିଖରରେ ତିନିଦିନ ଧରି ଚାଲିଥିବା ନିୟମରାଜା ପରବ ରବିବାର ଉଦଯାପିତ ହୋଇ ଯାଇଛି। ଗତ ୨୫ତାରିଖରେ ନିୟମରାଜା ପରବ ଆରମ୍ଭ ହୋଇ ତିନିଦିନ କଳାହାଣ୍ଡି ଓ ରାୟଗଡା ଜିଲାର ଶହ ଶହ ଡଙ୍ଗରିଆ ଏହି ଉତ୍ସବରେ ଯୋଗଦେଇ ନିୟମରାଜାକୁ ଆରାଧନା କରିବା ସହ ବୁଦା, ଘୁଷୁରି, କୁକୁଡ଼ା ଆଦି ବଳି ଦେଇ ନିଜ ନିୟମଗିରିର ସୁରକ୍ଷା ସହ ଆଦିବାସୀ ମାନେ ବଞ୍ଚିଥିବା ପର୍ଯ୍ୟନ୍ତ ନିୟମଗିରିର ମୁଠାଏ ମାଟି ବହୁ ରାଷ୍ଟ୍ରୀୟ କମ୍ପାନୀକୁ ଦିଆଯିବ ନାହିଁ ବୋଲି ବଜ୍ର ଶପଥ ନେଇଥିଲେ। ମାଟି, ପାହାଡ଼, ଝରଣା, ପଥର ଓ ଗଛ ଆଦିବାସୀ ମାନଙ୍କ ଜୀବନ। ଏମାନଙ୍କ କୃପାରୁ ଆଦିବାସୀ ମାନଙ୍କ ଜୀବନ ଜୀବିକା ବଞ୍ôଚ ରହିଛି। ଯଦି ନିୟମଗିରି ପାହାଡକୁ ତାଙ୍କଠାରୁ ଛଡାଇ ନିଆଯାଏ ତେବେ ରକ୍ତର ନଦୀ ବହିବ ସିନା ନିୟମଗିରି ପାହାଡର ମୁଠାଏ ମାଟି କାହାରିକୁ ଦିଆ ଯିବ ନାହିଁ ବୋଲି ସଂକଳ୍ପ ନେଇ ତିନିଦିନ ଧରି ଚାଲିଥିବା ନିୟମଗିରି ପାହାଡ ଶିଖରରେ ଡଙ୍ଗରିଆ କନ୍ଧଙ୍କ ଆଦିବାସୀ ସଂସ୍କୃତି ଓ ପରମ୍ପରାର ଅନନ୍ୟ ନିଦର୍ଶନ ନିୟମରାଜା ପରବ ପ୍ରଥମ ଦିନରେ ଶୁଭଖମ୍ବ ସ୍ଥାପନ ସହିତ ପୂଜାର୍ଚ୍ଚନା ଆରମ୍ଭ ହୋଇଥିଲା। ଆଦିବାସୀ ମହିଳାଙ୍କ ଦେହରେ କାଳିସୀ ସବାର ହେବା ପୂଜାର୍ଚ୍ଚନା ଜମିବାକୁ ଲାଗିଥିଲା।
ଆଦିବାସୀ ସଂପ୍ରଦାୟ ବ୍ୟତୀତ ଜିଲ୍ଲା ତଥା ଜିଲ୍ଲା ବାହାର ସାଧାରଣ ଲୋକେ, ପରିବେଶବିତ୍, ଗଣମାଧ୍ୟମ ପ୍ରତିନିଧିମାନେ ପର୍ବତ ଶିଖରର ଉତ୍ସବରେ ସାମିଲ ହୋଇଥିଲେ। ନିଜର ମାଁ ମାଟିର ସୁରକ୍ଷା ପାଇଁ ଅଞ୍ଚଳର ଶହ ଶହ ଆଦିବାସୀ ପୁରୁଷ, ମହିଳା ଏଥିରେ ସ୍ୱତଃସ୍ଫୁର୍ତ୍ତ ଭାବେ ସାମିଲ ହେବା ଅଭୁତପୂର୍ବ ଦୃଶ୍ୟ ଥିଲା। ନିୟମଗିରି ସୁରକ୍ଷା ସମିତି ଆହ୍ୱାନରେ ଆଦିବାସୀ ନେତା ଓ ସମାଜକର୍ମୀ ନେତୃତ୍ୱ ନେଇଥିଲେ।
