ଲାଞ୍ଜିଗଡ଼: କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ଲାଞ୍ଜି ଗ୍ରାମପଞ୍ଚାୟତରେ ଏକ ପ୍ରକାର ସରକାରଙ୍କ ସାମାଜିକ ସୁରକ୍ଷା ଓ ଜାତୀୟ ପରିବାର ମଙ୍ଗଳ ଯୋଜନା ବାଟବଣା ହୋଇଥିବା ଏବେ ଚର୍ଚ୍ଚା ହେଉଛି। ଯାହା ଫଳରେ ଅସହାୟ ଗରିବ ବିଧବା ମହିଳାମାନେ ବର୍ଷ ବର୍ଷ ଧରି ଭତ୍ତା ପାଇପାରୁ ନ ଥିବା ଅଭିଯୋଗ ହେଉଛି। ସ୍ୱାମୀ ପରପାରିକୁ ଚାଲିଯିବାଠାରୁ ଆଜକୁ ହାରାହାରି ବର୍ଷେ ହେବ ଦୁଇ ପୁଅ ଓ ଗୋଟିଏ ଝିଅ ସହ ଅତି ଦୁଃଖ କଷ୍ଟରେ ଜୀବନ ବିତାଉଛନ୍ତି ଲାଞ୍ଜି ଗ୍ରାମପଞ୍ଚାୟତ ଅଧୀନସ୍ଥ ସିନ୍ଧିପଦର ଗାଁର ଘସେନ ମାଝୀ। ଏପଟେ ପଞ୍ଚାୟତରୁ ଆରମ୍ଭ କରି ବ୍ଲକ ପର୍ଯ୍ୟନ୍ତ ଦୌଡ଼ି ଦୌଡ଼ି ନୟାନ୍ତ ହେବା ସହ ସରପଞ୍ଚଙ୍କଠାରୁ ଅନେକ ସରକାରୀ ବାବୁଙ୍କୁ ଗୁହାରି କରିଥିଲେ ମଧ୍ୟ ଆଜି ପର୍ଯ୍ୟନ୍ତ ବିଧବା ଭତ୍ତା ଖଣ୍ଡିକ ଓ ଜାତୀୟ ପରିବାର ମଙ୍ଗଳ ଯୋଜନାରୁ ୨୦ ହଜାର ଟଙ୍କା ଏପର୍ଯ୍ୟନ୍ତ ପାଇପାରୁନଥିବା ପ୍ରକାଶ କରିଛନ୍ତି ବିଧବା ଘସେନ। ପରିବାର ଅତି ଗରିବ ଶ୍ରେଣୀର ହୋଇଥିବାବେଳେ ସ୍ୱାମୀଙ୍କ ମୃତ୍ୟୁ ପରଠାରୁ ଏକା କୁଲି ମଜୁରୀ କରି ଘର ସମ୍ଭାଳିଥା’ନ୍ତି ଘସେନ। ତେବେ ଜାତୀୟ ପରିବାର ମଙ୍ଗଳ ଯୋଜନାରୁ ୨୦ ହଜାର ଟଙ୍କା ସହ ଭତ୍ତା ଖଣ୍ଡିକ ଯୋଗାଇ ଦେବାପାଇଁ ଘସେନ ବ୍ଲକ ପ୍ରଶାସନ ତଥା ଜିଲ୍ଲା ପ୍ରଶାସନଙ୍କୁ ଆକୁଳ ଗୁହାରି କରିଛନ୍ତି।
ଏନେଇ ସ୍ଥାନୀୟ ପିଇଓ ସାଧୁରାମ ସାହୁଙ୍କୁ ପଚାରିବାରୁ କହିଛନ୍ତି ଯେ, କଣ ହୋଇଛି ତାଙ୍କର ମୁଁ କହିପାରିବିନି। ମୁଁ ଉପରିସ୍ଥ ଅଧିକାରୀଙ୍କୁ ଜଣାଇବି। ତେବେ ଏ ଦିଗରେ ଜିଲ୍ଲା ତଥା ବ୍ଲକ ପ୍ରଶାସନ ଦୃଷ୍ଟି ଦେଇ ବିହିତ ପଦକ୍ଷେପ ନେବାକୁ ଘସେନଙ୍କ ସହ ତାଙ୍କ ବଡ଼ ଝିଅ ନେହୁରା ହୋଇ ଗୁହାରି କରିଛନ୍ତି।
Comments are closed.