ଲଡୁଗାଁ : ପଞ୍ଚାୟତ କାର୍ଯ୍ୟାଳୟ ଗଠନକୁ ନେଇ ତୁନଗାଁ ଓ କନ୍ଦାବୁଟୁରା ବିବାଦ ଲାଗିରହିଥିଲା। ଏହି ବିବାଦୀୟ ମାମଲା ଯାଇ ଅଦାଲତରେ ବିଚାରାଧୀନ ଅବସ୍ଥାରେ ରହିଛି। ବିବାଦୀୟ ପଞ୍ଚାୟତ ଯୋଗୁଁ ଜନସାଧାରଣଙ୍କର ହେଉଥିବା ସମସ୍ୟାକୁ ଦୃଷ୍ଟିରେ ରଖି ଜିଲାପାଳଙ୍କ ଚିଠି ନଂ ୨୨୫ ଅନୁଯାୟୀ, କୋକସରା ବ୍ଲକ ପ୍ରଶାସନ ପକ୍ଷରୁ କୋକସରା ସାମାଜିକ ସୁରକ୍ଷା ଅଧିକାରୀ ଦୀପକ ବେହେରାଙ୍କୁ କନ୍ଦାବୁଟୁରା ସରପଞ୍ଚ ଭାବେ ମନୋନୀତ କରାଯାଇଛି । ଯୋଗଦେବା ପରେ ଲୋକମାନଙ୍କ ନିକଟତର ହୋଇ ସମସ୍ତଙ୍କ ସୁବିଧା ଅସୁବିଧା ପଚାରି ବୁଝିଥିଲେ। ତେବେ ଲୋକମାନେ ଦୀପକଙ୍କୁ ଭତ୍ତା, ପରିମଳ ବ୍ୟବସ୍ଥା, ଦିବ୍ୟାଙ୍ଗମାନଙ୍କ ପାଇଁ ଆବଶ୍ୟକୀୟ ଉପକରଣ ତଥା ପାନୀୟ ଜଳ ଜନିତ ସମସ୍ୟା ଦାବିଗୁଡିକ ଉପସ୍ଥାପନ କରିଥିଲେ। ଏନେଇ ତତ୍ପରତା ପ୍ରକାଶ କରି ଲୋକମାନଙ୍କ ସମସ୍ୟାକୁ ଦୃଷ୍ଟିରେ ରଖି ପଞ୍ଚାୟତ ଅଧୀନରେ ଥିବା ନଳକୂପଗୁଡିକର ପାଣି ଟିଡିଏସ୍ ମାନ ପରୀକ୍ଷଣ କରାଯାଇଛି। କରାଯିବା ପରେ ତୁନଗାଁର ପାଞ୍ଚଗୋଟି ନଳକୂପରୁ ଦୁଇଟି ନଳକୂପର ପାଣି ପିଇବା ଉପଯୋଗୀ ବୋଲି ଜଣାପଡିଛି। ଏନେଇ ଲୋକମାନଙ୍କୁ ଅବଗତ କରାଇ କିଭଳି ବିଶୁଦ୍ଧ ପାନୀୟ ଜଳ ଯୋଗାଣ ହେବ ସେନେଇ ଖୁବଶୀଘ୍ର ସୁବିଧା ଉପଲବ୍ଧ କରାଇବେ ବୋଲି ପ୍ରତିଶ୍ରୁତି ଦେଇଛନ୍ତି। ଡ୍ରେନ୍ଗୁଡ଼ିକ ସଫା କରାଇବା ସହ ତୁନଗାଁର ଜଣେ ଦିବ୍ୟାଙ୍ଗ ବ୍ୟକ୍ତି ପ୍ରହଲ୍ଲାଦ ଶବରଙ୍କୁ ହ୍ବିଲ ଚେୟାର ପ୍ରଦାନ କରିଛନ୍ତି। ଏହା ବ୍ୟତୀତ ମନରେଗା ଯୋଜନାରେ ଏକ ଖେଳ ପଡିଆ ଓ ରୁରାଲ ପାର୍କ ପାଇଁ ଜାଗା ଚିହ୍ନଟ କରିବା ନିମନ୍ତେ ବିଡିଓଙ୍କ ଜରିଆରେ ତହସିଲଦାରଙ୍କୁ ଜଣାଇଛନ୍ତି। ଜନସାଧାରଣ ଏବେ ତାଙ୍କ ଆଶା ପୂରଣ ହେଉଥିବା ଦେଖି ଖୁସି ବ୍ୟକ୍ତ କରୁଥିବା ବେଳେ ବେଶ୍ ଚର୍ଚ୍ଚାରେ ଅଛନ୍ତି କନ୍ଦାବୁଟୁରା ସରପଞ୍ଚ ଦାୟିତ୍ୱରେ ଥିବା ବ୍ଲକ ସାମାଜିକ ସୁରକ୍ଷା ଅଧିକାରୀ ଦୀପକ କୁମାର ବେହେରା।
Popular Categories
Previous article
Next article