ନୂଆଦିଲ୍ଲୀ – ଉତ୍ତରକୋରିଆର ଏକଚାଟିଆ ଶାସକ କିମ୍ ଜୋଙ୍ଗ ଯୁଦ୍ଧ ପାଇଁ ପ୍ରସ୍ତୁତ ରହିବାକୁ ଆହ୍ୱାନ ଦେଇଛନ୍ତି । ସେ ନିଜର ସେନା ପ୍ରମୁଖଙ୍କୁ ବରଖାସ୍ତ କରି ଦେଇଛନ୍ତି । ତାଙ୍କ ଦେଶରେ ଅଧିକ ଯୁଦ୍ଧାସ୍ତ୍ର ଉତ୍ପାଦନ କରିବା ସହ ଯୁଦ୍ଧାଭ୍ୟାସ ଜୋରଦାର କରିବା ପାଇଁ ନିର୍ଦେଶ ଦେଇଛନ୍ତି । ଉତ୍ତରକୋରିଆର ସରକାରୀ ଗଣମାଧ୍ୟମ କେସିଏନ୍ଏ ପକ୍ଷରୁ ଏହି ସୂଚନା ଦିଆଯାଇଛି ।
କିମ୍ ଜୋଙ୍ଗ ଦେଶର କେନ୍ଦ୍ରୀୟ ସୈନ୍ୟ ଆୟୋଗର ଏକ ବୈଠକରେ ଏହି ସୂଚନା ଦେଇଛନ୍ତି । ଉତ୍ତରକୋରିଆର ଶତ୍ରୁମାନଙ୍କୁ ରୋକିବା ପାଇଁ ଏହି ପଦକ୍ଷେପ ନେଉଥିବା କଥା ସେ କହିଛନ୍ତି । ମାତ୍ର ଏଥିରେ ସେ କୌଣସି ଦେଶର ନାଁ ନେଇ ନାହାନ୍ତି ।
ଗତ ସପ୍ତାହରେ କିମ୍ ଜୋଙ୍ଗ ବିଭିନ୍ନ ଯୁଦ୍ଧାସ୍ତ୍ର କାରଖାନା ପରିଦର୍ଶନ କରିଥିଲେ । ଅଧିକ କ୍ଷେପଣାସ୍ତ୍ର ଯନ୍ତ୍ରାଂଶ , ତୋପ ଏବଂ ଅନ୍ୟ ଆଗ୍ନେୟାସ୍ତ୍ର ତିଆରି କରିବା ପାଇଁ ସେ ସେହି ସମୟରେ ନିର୍ଦେଶ ଦେଇଥିଲେ । ଏବେ ଉତ୍ତରକୋରିଆ ୟୁକ୍ରେନ ଯୁଦ୍ଧ ପାଇଁ ରୁଷ୍କୁ କେତକ ଯୁଦ୍ଧାସ୍ତ୍ର ଯୋଗାଉଥିବାର ଅଭିଯୋଗ ହୋଇଛି । ଆମେରିକା ପକ୍ଷରୁ ଏହି ଅଭିଯୋଗ କରାଯାଇଛି ।
