କେନ୍ଦୁଝରଗଡ: କେନ୍ଦୁଝର ଅବକାରୀ ବିଭାଗ ପକ୍ଷରୁ ରବିବାର ବିଳମ୍ବିତ ରାତିରେ ଚଢ଼ଉ କରି ୫ଟି ଯାନରେ ଖାଲି ହେଉଥିବା ୨୮୦କ୍ୟୁଣ୍ଟାଲ ମହୁଲ ସମେତ ମହୁଲ ପରିବହନ କରୁଥିବା ଗୋଟି ୧୬ ଚକିଆ ଟ୍ରକ ଓ ୪ଟି ପିକ୍ଅପ୍ ଭ୍ୟାନକୁ ଜବତ କରାଯାଇଛି। ଏଥିସହ ଏହି ଘଟଣାରେ ସମ୍ପୃକ୍ତ ୫ଜଣ ଚାଳକଙ୍କୁ ଗିରଫ ସହ ସୋମବାର କୋର୍ଟ ଚାଲାଣ କରାଯାଇଛି। ସାଧାରଣ ନିର୍ବାଚନକୁ ଆଖିଆଗରେ ରଖି କେନ୍ଦୁଝର ଅବକାରୀ ଅଧିକ୍ଷକ ପ୍ରଦୀପ୍ତ କୁମାର ଦାସଙ୍କ ନିର୍ଦ୍ଦେଶରେ ଅବକାରୀ ବିଭାଗ ଉପ-ଅଧିକ୍ଷକ ଦିବ୍ୟରଞ୍ଜନ ଦୀପଙ୍କ ପ୍ରତ୍ୟକ୍ଷ ତ୍ତ୍ୱାବଧାନରେ ଏହି ଚଢ଼ଉ କରାଯାଇ ରବିବାର ରାତି ପ୍ରାୟ ୨ଟାରେ କେନ୍ଦୁଝର ସହର ଉପକଣ୍ଠ ବାମ୍ପାରସ୍ଥିତ ରେଳ ଓଭରବ୍ରିଜ୍ ନିକଟରେ ଗୋଟିଏ ଟ୍ରକ ଓ ୪ଟି ପିକ୍ଅପ ଭ୍ୟାନ ମହୁଲ ଖାଲି କରିବା ସମୟରେ ଅବକାରୀ ବିଭାଗ କର୍ମଚାରୀଙ୍କ ହାବୁଡରେ ଧରା ପଡିଥିଲେ।
ଉକ୍ତ ସ୍ଥନରେ ଖାଲି ହେଉଥିବା ମହୁଲ ଛତିଶଗଡ ରାଜ୍ୟର ରାୟପୁରରୁ ବୋଝେଇ ହୋଇ ଝାରଖଣ୍ଡ ରାଜ୍ୟର ପୂର୍ବ-ସିଂହଭୂମ ଜିଲା ବାହାଳାଗୁଡାକୁ ପରିବହନ ପରମିଟ୍ ଥିବାବେଳେ କେଉଁ ପରିସ୍ଥିତିରେ ଓ କାହା ନିର୍ଦ୍ଦେଶରେ ଉକ୍ତ ସ୍ଥାନରେ ମହୁଲ ଖାଲି କରାଯାଉଥିବା ସେ ନେଇ ଅବକାରୀ ବିଭାଗ ପକ୍ଷରୁ ଅଧିକ ତଦନ୍ତ ଜାରି ରହିଛି। ଏହି ଘଟଣାରେ ଅବକାରୀ ବିଭାଗ ପକ୍ଷରୁ ମହୁଲ ସମେତ ୫ଟି ଯାନକୁ ଜବତ କରାଯାଇଥିବା ବେଳେ ଚାଳକ ବିହାର ରାଜ୍ୟର ଆସୋଆଁ ଥାନା ଅଧିନ କନ୍ଧପୋଖର ଗ୍ରାମର ରାମଜୀ କୁମାର, କେନ୍ଦୁଝର ଟାଉନ ଥାନା ଅଧିନ ଧୋବାଡିହା ମାଝିସାହିର ଗୁରା ମାର୍ଡି, ଜୁଡିଆ ମୁଣ୍ଡାସାହିର ରାଜା ମୁଣ୍ଡା, ସଦର ଥାନା କାଠକରଞ୍ଜିଆ ଗ୍ରାମର ସବ୍ୟସାଚୀ ମୁଣ୍ଡା ଓ ଟାଉନ ଥାନା ଅଧିନ ଜନାର୍ଦ୍ଦନପୁରର ଗିରିଧାରୀ ନାଏକଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ବେଳେ ଏହି ଘଟଣାର ମାଷ୍ଟରମାଇଣ୍ଡ ସମ୍ପର୍କରେ ଅଧିକ ତଦନ୍ତ ଜାରି ରହିଥିବା ତଦନ୍ତକାରୀ ଅଧିକାରୀ ଅବକାରୀ ଉପ-ଅଧିକ୍ଷକ ଶ୍ରୀ ଦୀପ କହିଛନ୍ତି।
Comments are closed.