କାଶୀପୁର:ରାୟଗଡା ଜିଲା କାଶୀପୁର ବ୍ଲକରେ ଥମୁନି ଜନନୀ ଯନ୍ତ୍ରଣା। ପ୍ରତିଦିନ ଜିଲାର ବିଭିନ୍ନ ସ୍ଥାନରେ ଏଭଳି ଦୃଶ୍ୟ ଦେଖିବାକୁ ମିଳିଛୁ। କେଉଁଠି ଗର୍ଭବତୀଙ୍କୁ ଭାରରେ ବୁହା ହେଉଛି, ତ ଅନ୍ୟ କେଉଁଠି ରାସ୍ତା କଡରେ ପ୍ରସୂତି ଜନ୍ମ ଦେଉଥିବା ଦେଖିବାକୁ ମିଳିଛି। ଏହି ଦୁଇଟି ଯାକ ଦୃଶ୍ୟ ରାୟଗଡା ଜିଲା କାଶୀପୁର ବ୍ଲକରେ ଆଜି ଦେଖିବାକୁ ମିଳିଛି। ଗାଁକୁ ରାସ୍ତା ନଥିବାରୁ ପ୍ରଥମେ ଗର୍ଭବତୀଙ୍କୁ ଭାରରେ ବୁହା ଯାଇଥିଲା ଏବଂ ପରେ ଆଶା ଦିଦି ସାହଯ୍ୟରେ ରାସ୍ତା କଡରେ ପ୍ରସୂତି ପ୍ରସବ କରିଥିଲେ।
ସୂଚନାଯୋଗ୍ୟ, ରାୟଗଡା ଜିଲା କାଶୀପୁର ବ୍ଲକର ମାଇକଞ୍ଚ ଗ୍ରାମ ପଞ୍ଚାୟତ ଅଧିନରେ ଥିବା ସିନ୍ଧିଗୁଡା ଗ୍ରାମର ଲମ୍ବୁଧର ଗୌଡଙ୍କ ପତ୍ନୀ କୁନ୍ତଲା ଗୌଡ (୧୯)ଙ୍କୁ ପ୍ରସବ ଯନ୍ତ୍ରଣା ହୋଇଥିଲା।
ପରିବାର ଲୋକେ ୧୦୮ ଆମ୍ବୁଲାନସକୁ ଯୋଗାଯୋଗ କରିଥିଲେ। ହେଲେ ଗାଁକୁ ରାସ୍ତା ନଥିବାରୁ ଗାଡି ଅଧା ବାଟରେ ଅଟକି ରହିଥିଲା। ଆଶା ଦିଦି ମାଣିକ ଦଳପତି, ୧୦୨ଆମ୍ବୁଲାନସ ଚାଳକ ପରୀକ୍ଷିତ ନାଏକ ଏବଂ କୈଳାଶ ଲିମା ଭାର ଯୋଗେ ଗର୍ଭବତୀକୁ ନଦୀପାର କରି ଆଣିଥିଲେ। କିନ୍ତୁ ପ୍ରସବ ବେଦନା ଅତ୍ୟାଧିକ ହେବାରୁ ଆମ୍ବୁଲାନସ ନିକଟରେ ପହଞ୍ଚିବା ପୂର୍ବରୁ ଆଶା ଦିଦି ସାହାଯ୍ୟରେ ରାସ୍ତା କଡ଼ରେ ପ୍ରସୂତି ଏକ ଶିଶୁକନ୍ୟାକୁ ଜନ୍ମ ଦେଇଥିଲେ। ଏହାପରେ ମା ଏବଂ ନବଜାତକଙ୍କୁ ତୁରନ୍ତ ଡଙ୍ଗାସିଲ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ସେଠାରେ ଚିକିତ୍ସା ପରେ ଉଭୟ ମାଆ ଏବଂ ନବଜାତକ ସୁସ୍ଥ ରହିଛନ୍ତି ବୋଲି ଡଙ୍ଗାସିଲ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ଡାକ୍ତର ସୂଚନା ଦେଇଛନ୍ତି।
