ବେଙ୍ଗାଲୁରୁ : କର୍ଣ୍ଣାଟକରେ ଗଠିତ ବିଜେପିର ନୂଆ ସରକାର ଅସନ୍ତୁଷ୍ଟ ନେତାଙ୍କୁ ମନାଇବାକୁ ପ୍ରୟାସ ଜାରି ରଖିଛି। ଏହି କ୍ରମରେ ପ୍ରଥମ ମନ୍ତ୍ରିମଣ୍ଡଳ ସମ୍ପ୍ରସାରଣ ପରେ ୟେଦୁରପ୍ପା ଏବେ ୩ ଜଣଙ୍କୁ ଉପମୁଖ୍ୟମନ୍ତ୍ରୀ କରିଛନ୍ତି।
ୟେଦୁରପ୍ପା ସୋମବାର ନବନିଯୁକ୍ତ ମନ୍ତ୍ରୀଙ୍କୁ ବିଭାଗ ବଣ୍ଟନ କରିଥିଲେ। ଏହାସହ ସେ ୩ ଉପମୁଖ୍ୟମନ୍ତ୍ରୀ ଭାବେ ଲକ୍ଷ୍ମଣ ସାଭାଦୀ, ଗୋବିନ୍ଦ ଏମ କରଜୋଲ ଏବଂ ଅଶ୍ୱଥ ନାରାୟଣଙ୍କୁ ଦାୟିତ୍ୱ ଅର୍ପଣ କରାଯାଇଛି। ନବନିଯୁକ୍ତ ଉପମୁଖ୍ୟମନ୍ତ୍ରୀଙ୍କ ମଧ୍ୟରୁ ଲକ୍ଷ୍ମଣ ସାଭାଦୀ ବିଧାୟକ ନଥିବାବେଳେ ବିଧାନ ପରିଷଦର ସଦସ୍ୟ ବି ନାହାନ୍ତି। କୁହାଯାଉଛି ଯେ ଦଳର ବରିଷ୍ଠ ନେତା ଏବଂ ମୁଖ୍ୟମନ୍ତ୍ରୀ ୟେଦୁରପ୍ପା ଉପମୁଖ୍ୟମନ୍ତ୍ରୀ ନିଯୁକ୍ତି ସପକ୍ଷରେ ନାହାନ୍ତି। ଏହାଦ୍ୱାରା ପାର୍ଟିରେ ବିଦ୍ରୋହ ହେବାର ଆଶଙ୍କା ଥିବା ସେମାନେ ପ୍ରକାଶ କରିଛନ୍ତି। ୟେଦୁରପ୍ପାଙ୍କ କ୍ୟାବିନେଟରେ ଲିଂଗାୟତ ସମ୍ପ୍ରଦାୟରୁ ୭, ଓବିସିରୁ ୨, ବ୍ରାହ୍ମଣ ସମାଜରୁ ଜଣେ, ଭୋକାଲିଙ୍ଗା ସମ୍ପ୍ରଦାୟରୁ ୩ ଏବଂ ଏସସି/ଏସଟି ସମୂଦାୟରୁ ୪ ଜଣଙ୍କୁ ମନ୍ତ୍ରୀ କରାଯାଇଛି। ମୁଖ୍ୟମନ୍ତ୍ରୀ ବିଏସ ୟେଦୁରପ୍ପା ଲିଂଗାୟତ ସମୂଦାୟରୁ ଆସୁଛନ୍ତି। ତାଙ୍କୁ ମିଶାଇ ସରକାରରେ ୮ ଜଣ ଲିଂଗାୟତ ସମୂଦାୟର ମନ୍ତ୍ରୀ ଅଛନ୍ତି।
