ସୁନ୍ଦରଗଡ଼ : ସୁନ୍ଦରଗଡ଼ ଜିଲା ଓ ଦୌରା ଜଜ୍ ଶୁଭଦର୍ଶୀ ପଟ୍ଟନାୟକ ୨୦୧୪ରେ ସଂଗଠିତ କରଲାକାନୀ ମଧ୍ୟରାତ୍ର ହତ୍ୟାକାଣ୍ଡ ଘଟଣାର ବିଚାର କରି ଦୁଇ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଓ ତଣ୍ଡ ଗଣିବା ପାଇଁ ଆଦେଶ ଦେଇଛନ୍ତି । ମୋକଦ୍ଦମାର ବିବରଣୀରୁ ପ୍ରକାଶ, ରାଜଗାଙ୍ଗପୁର ଥାନା ଅନ୍ତର୍ଗତ କରଲାକାନୀ ଗ୍ରାମରେ ମୃତ ବିଶ୍ରାମ ନାଗ ତାଙ୍କ ବଡ଼ଭାଇ ଓ ଭାଉଜ ଘର ଅଗଣାରେ ଶୋଇଥିବା ବେଳେ ୨୩.୪.୨୦୧୪ ମଧ୍ୟରାତ୍ରିରେ ପୂର୍ବ ଶତୃତାର ରାଗ ରଖି ଏହି ଗାଁର ଦିଲୀପ ବାଗ ଓ ରାମଜୀ ବାଗ ମାରଣାସ୍ତ୍ରରେ ବିଶ୍ରାମଙ୍କୁ ଆକ୍ରମଣ କରିଥିଲେ । ଫଳରେ ବିଶ୍ରାମ ଗୁରୁତର ଆହତ ହେବାରୁ ତାଙ୍କୁ ରାଜଗାଙ୍ଗପୁର ହସ୍ପିଟାଲକୁ ଚିକିତ୍ସା ପାଇଁ ନିଆଯାଇଥିଲା ମାତ୍ର ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ପରେ ମୃତ ବିଶ୍ରାମର ଭାଉଜ ସବିତା ନାଗ ରାଜଗାଙ୍ଗପୁର ଥାନାରେ ଏତଲା ଦେବାରୁ ରାଜଗାଙ୍ଗପୁର ପୁଲିସ ଏକ ହତ୍ୟା ମାମଲା ରୁଜୁ କରି ଦୁଇ ଅଭିଯୁକ୍ତ ଦିଲୀପ ଓ ରାମଜୀଙ୍କୁ ଗିରଫ କରି କୋର୍ଟ ଚାଲାଣ କରିବା ସହ ପରବର୍ତ୍ତୀ ସମୟରେ ସେମାନଙ୍କ ବିରୋଧରେ ଅଦାଲତରେ ଅଭିଯୋଗପତ୍ର ଦାଖଲ କରିଥିଲେ । ଜିଲା ଦୌରା ଜଜ୍ ଶ୍ରୀ ପଟ୍ଟନାୟକ ପ୍ରତ୍ୟକ୍ଷଦର୍ଶୀଙ୍କ ସମେତ ୧୩ଜଣ ସାକ୍ଷୀଙ୍କ ବୟାନ ଓ ସୁନ୍ଦରଗଡ଼ ଜିଲା ମୁଖ୍ୟ ସରକାରୀ ଓକିଲ ଅବଦୁଲ ସମୀମ ଅଖତରଙ୍କ ବଳିଷ୍ଠ ଯୁକ୍ତିକୁ ଗ୍ରହଣ କରି ଦୁଇ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଦେବା ସହ ହଜାରେ ଟଙ୍କା ତଣ୍ଡ ଦେବା ପାଇଁ ଆଦେଶ ଦେଇଥିଲେ। ତଣ୍ଡ ଅନାଦେୟ ଅଧିକ ଏକ ମାସ କାରାଦଣ୍ଡ ଭୋଗିବା ପାଇଁ ନିଜ ରାୟ ସ୍ପଷ୍ଟ କରିଛନ୍ତି । ଘଟଣାଟି ସେତେବେଳେ କରଲାକାନୀ ଗାଁ କାହିଁକି ସମଗ୍ର ରାଜଗାଙ୍ଗପୁର ବ୍ଲକରେ ଆଲୋଡନ ସୃଷ୍ଟି କରିଥିଲା ।
Comments are closed.