କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ପୂଜାରିଗୁଡା ପଞ୍ଚାୟତରେ ଥିବା ବାଳିକା ଉଚ୍ଚବିଦ୍ୟାଳୟ ପ୍ରଧାନଶିକ୍ଷକ କେ ସମେଶ୍ୱର ରାଓଙ୍କର ବୁଧବାର ପରଲୋକ ଘଟିଛି । ସେ କଲ୍ୟାଣସିଂହପୁର ସରକାରୀ ଉଚ୍ଚ ବିଦ୍ୟାଳୟରେ ପ୍ରାୟ ୧୦ ବର୍ଷ ୨ମାସ ପ୍ରଧାନଶିକ୍ଷକ ଭାବେ ଦାୟିତ୍ୱ ତୁଲାଇ ଆସୁଥିଲେ । ଏହାପରେ ତାଙ୍କର ପୂଜାରିଗୁଡା ବାଳିକା ଉଚ୍ଚ ବିଦ୍ୟାଳୟକୁ ବଦଳି ହୋଇଥିଲା । ସେହିଠାରୁ ସେ ନିଜ ଘର ଅମଲାଭଟାକୁଠାରୁ ଯାତାୟତ କରିଆସୁଥିଲେ । କିଛିଦିନ ହେବ ପୂଜାରିଗୁଡା ବିଦ୍ୟାଳୟ କାର୍ଯ୍ୟ ସାରି ଘରକୁ ଫେରିବା ସମୟରେ ବାଇକ ଦୁର୍ଘଟଣାରେ ଗୁରୁତର ହୋଇ ବିଶାଖାପାଟଣାରେ ଚିକିତ୍ସିତ ହୋଇ ଫେରିଥିଲେ । ସେହିଦିନଠାରୁ ସେ ଅସୁସ୍ଥ ହୋଇପଡିଥିଲେ । ୨୧ତାରିଖରେ ସେ ବିଦ୍ୟାଳୟକୁ ଆସି କୌଣସି କାର୍ଯ୍ୟରେ ରାୟଗଡା ଯାଇଥିଲେ । ସେହିଠାରେ ସେ ଅସୁସ୍ଥତା ଅନୁଭବ କରିବାରୁ ତାଙ୍କୁ ଜିଲା ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରୁ ସୁସ୍ଥ ହୋଇ ସେ ଘରକୁ ଫେରି ଯାଇଥିଲେ । ୨୩ ତାରିଖରେ ପୁଣି ଅସୁସ୍ଥତା ଅନୁଭବ କରିବାରୁ ସ୍ୱାସ୍ଥ୍ୟକେନ୍ଦ୍ରକୁ ନେଉଥିବା ବେଳେ ରାସ୍ତାରେ ତାଙ୍କର ମୃତ୍ୟୁ ହୋଇଯାଇଥିଲା । ଏହି ଖବର ପ୍ରଚାରିତ ହେବା ପରେ ବିଦ୍ୟାଳୟ ତଥା ଅଞ୍ଚଳରେ ଶୋକର ଛାୟା ଖେଳିଯାଇଛି ।
Comments are closed.