କଲମପୁର : ଗତ କିଛି ଦିନ ହେବ ଥୁଆମୁଳ ରାମପୁର ବ୍ଲକ ଅଧିନସ୍ଥ ଚିଙ୍ଗିଡିପାସ ଗ୍ରାମରେ ଡାଇରିଆ ରୋଗର ପ୍ରଭାବ ଦେଖା ଦେଇଥିଲା। ଏଥିରେ ଦୁଇ ଆକ୍ରାନ୍ତଙ୍କ ମୃତ୍ୟୁ ହେଇଥିବା ଅଭିଯୋଗ ହେଇଥିଲା। ବଫଲାମାଳି ଖଣି ଖନନ ଦ୍ୱାରା ଏହି ଅଂଚଳ ପ୍ରଭାବିତ। ତେଣୁ ଖଣି ଖନନ କରୁଥିବା ଉତ୍କଳ ଆଲୁମିନା କମ୍ପାନୀର ଖଣି ପ୍ରଭାବିତ ଅଂଚଳର ବିକାଶ କାର୍ଯ୍ୟ ନେଇ ପ୍ରଶ୍ନ ଉଠିଥିଲା। ଖଣି ଖନନ ଅଂଚଳର ପାରିପାଶ୍ୱିର୍କ ବିକାଶ ସମ୍ପୃକ୍ତ କମ୍ପାନୀର ଦାୟିତ୍ୱ । କିନ୍ତୁ ଏହି ଅଂଚଳରେ ସ୍ୱାସ୍ଥ୍ୟ, ଶିକ୍ଷା ଓ ଗମନା ଗମନ ଭଳି ସୁବିଧା ପ୍ରତି ଦୃଷ୍ଟି ଦିଆଯାଇନଥିବାରୁ ଅନେକ ଲୋକ ସ୍ୱାସ୍ଥ୍ୟ ସେବାର ଅପହଂଚ ଦୂରତାରେ ରହିଯାଇଛନ୍ତି। ଗ୍ରାମବାସୀଙ୍କ କହିବା ଅନୁସାରେ କାଁ ଭାଁ କମ୍ପାନୀର ଏକ ଭ୍ରାମ୍ୟମାଣ ସ୍ୱାସ୍ଥ୍ୟ କେନ୍ଦ୍ର ମାଧ୍ୟମରେ ଲୋକଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇ କିଛି ଔଷଧ ଦିଆଯାଉଥିଲା। କିନ୍ତୁ ଏହି ଡାଇରିଆ ଆକ୍ରାନ୍ତ ଖବର ପ୍ରସାରିତ ହେବା ପରେ ଗତ ୧୨ ଓ ୧୩ରେ କମ୍ପାନୀର ଭ୍ରାମ୍ୟମାଣ ସ୍ୱାସ୍ଥ୍ୟ କେନ୍ଦ୍ର ଓ ସି.ଏସ.ଆର ଟିମ ଏହି ଗାଁରେ ପହଂଚି ଲୋକଙ୍କ ଆବଶ୍ୟକ ମୁତାବକ ସ୍ୱାସ୍ଥ୍ୟ ସେବା ଯୋଗାଇଥିଲେ। ପ୍ରତିଷେଧକ ମୂଳକ ଔଷଧ ପ୍ରଦାନ କରିବା ସହ ସ୍ଥିତି ଅନୁଧ୍ୟାନ କରାଯାଇଥିଲା। ଗାଁରେ ୪୫ ପରିବାର ପାଇଁ ପାନୀୟ ଜଳ ପାଇଁ ଗୋଟିଏ ମାତ୍ର ନଳକୁଅ ଥିବା ଗ୍ରାମବାସୀ ଅଭିଯୋଗ କରିବା ସହ ଏକ ସୌର ଚାଳିତ ନଳକୁଅ ଯୋଗାଇ ଦେବା ପାଇଁ ଦାବି କରିଥିଲେ। ତୁରନ୍ତ ଏନେଇ ପଦକ୍ଷେପ ନିଆଯିବା ନେଇ କମ୍ପାନୀ ତରଫରୁ ପ୍ରତିଶ୍ରୁତି ଦିଆଯାଇଛି।
ସେହିଭଳି ଗ୍ରାମ୍ୟ ପାନୀୟ ଜଳ ଯୋଗାଣ ଓ ପରିମଳ ବିଭାଗ ଦ୍ୱାରା ନିୟୋଜିତ ତାଲିମ ପ୍ରାପ୍ତ ଆତ୍ମ ନିଯୁକ୍ତ ମେକାନିକଙ୍କ ଦ୍ୱାରା ପାନୀୟ ଜଳଉତ୍ସ ଗୁଡିକରେ କ୍ଲୋରିନ ଟାବଲେଟ ପକାଇ ବିଶୋଧିତ କରାଯାଇଥିଲା। ଗ୍ରାମର ପାନୀୟ ଜଳ ବିଶୋଧନ ପାଇଁ ବ୍ଲିଚିଂ ପାଉଡର ଓ ଔଷଧର ବ୍ୟବସ୍ଥା କରାଯାଇଥିଲା। ଭ୍ରାମ୍ୟମାଣ ସ୍ୱାସ୍ଥ୍ୟ କେନ୍ଦ୍ର ଡାକ୍ତରଙ୍କ ଦ୍ୱାରା ଏକ ସଚେତନତା ଶିବିର ଆୟୋଜନ କରାଯାଇ ୩୦ ଜଣ ଲୋକଙ୍କୁ ଡାଇରିଆ ରୋଗ ନିୟନ୍ତ୍ରଣ ନେଇ ତାଲିମ ପ୍ରଦାନ କରାଯାଇଥିଲା।
Comments are closed.