ଯାଜପୁର: ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗର ଲୋକାଭିମୁଖୀ ଯୋଜନା ଲୋକମାନଙ୍କ ପାଖରେ ପହଂଚାଇବା ସହ ଲୋକମାନଙ୍କୁ ମୂଲ୍ୟବୋଧ ଭିତ୍ତିକ ସେବା ପ୍ରଦାନ ପାଇଁ ଯତ୍ନବାନ ହେବାକୁ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ଅତିରିକ୍ତ ମୁଖ୍ୟ ସଚିବ ସତ୍ୟବ୍ରତ ସାହୁ ଆହ୍ୱାନ ଦେଇଛନ୍ତି। ବୁଧବାର ଅପରାହ୍ନରେ ଭିଡିଓ କନପଂରେନ୍ସ ମାଧ୍ୟମରେ ଅତିରିକ୍ତ ମୁଖ୍ୟ ସଚିବ ଶ୍ରୀ ସାହୁ ଯାଜପୁର ଜିଲ୍ଲାର ରାଜସ୍ୱ ବିଭାଗର ବିବିଧ କାର୍ଯ୍ୟକ୍ରମ ସଂପର୍କରେ ସମୀକ୍ଷା କରିଥିଲେ।
ସେ କହଛନ୍ତି, ରାଜସ୍ୱ ବିଭାଗ ସାଧାରଣ ଲୋକମାନଙ୍କର ଆଶା ଭରସା। ତେଣୁ ସେମାନଙ୍କର ଆବଶ୍ୟକୀୟ କାର୍ଯ୍ୟକୁ ନିର୍ଦ୍ଧାରିତ ସମୟ ଓ ଉପଯୁକ୍ତ ଭାବେ ନିର୍ବାହ କରିବା ସହ ଆଇନ ଅନୁସାରେ ସମୟ ଭିତ୍ତିକ ନ୍ୟାୟ ପ୍ରଦାନ ପାଇଁ ସେ ପରାମର୍ଶ ଦେଇଥିଲେ। ଅପର ପକ୍ଷରେ ମୋ ସରକାର, ପାଂଇଭ ଟି ଓ ଆର୍.ଟି.ପି.ଏସ୍. ଇତ୍ୟାଦି ବ୍ୟବସ୍ଥା ସରକାର ସାଧାରଣ ଲୋକଙ୍କୁ ସେବା ଯୋଗାଇବା ପାଇଁ ପ୍ରଣୟନ କରିଥିବାରୁ ଏହାର ଲକ୍ଷ୍ୟ ଓ ଉଦ୍ଦେଶ୍ୟକୁ ସାଧିତ କରିବାକୁ ସେ ନିର୍ଦ୍ଦେଶ ଦେଇଥିଲେ । ଜମି ବିକ୍ରି ହେବା ପରେ କ୍ରେତା ପଟ୍ଟା ପାଇବାକୁ ବାରମ୍ୱାର ନ ଦୈାଡି ନିର୍ଦ୍ଧାରିତ ସମୟରେ ପଟ୍ଟା ପାଇବା ଉଚିତ। ଏ କ୍ଷେତ୍ରରେ ଅବହେଳା ପାଇଁ ସଂପୃକ୍ତ ଅଧିକାରୀ ଓ କର୍ମଚାରୀମାନଙ୍କୁ ଉତ୍ତରଦାୟୀ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ତେଣୁ ବକେୟା ଥିବା ସମସ୍ତ ପଟ୍ଟା ଗୁଡିକୁ ପ୍ରସ୍ତୁତ କରି ରାଜସ୍ୱ ରଥ ମାଧ୍ୟମରେ ୨ ଦିନ ମଧ୍ୟରେ ସଂପୃକ୍ତ ବ୍ୟକ୍ତିମାନଙ୍କୁ ପ୍ରଦାନ କରିବାକୁ ଶ୍ରୀ ସାହୁ ନିର୍ଦ୍ଦେଶ ଦେଇଥିଲେ।
