ଆଠଗଡ : ଆଠଗଡ ଥାନା ଅନ୍ତର୍ଗତ ରଘୁନାଥପୁରପାଟଣା ଗ୍ରାମର ଯୁବତୀଙ୍କୁ ଅସଦାଚରଣ ମାମଲାର ବିଚାର କରି ଏସଡିଜେଏମ ଅଭିଯୁକ୍ତକୁ ଜେଲ ଓ ଜୋରିମନା ଦଣ୍ଡରେ ଦଣ୍ଡିତ କରି ମଙ୍ଗଳବାର ତାଙ୍କ ରାୟ ପ୍ରକାଶ କରିଛନ୍ତି । ପ୍ରକାଶ ଥାଉକି ଗତ ୨୦୧୫ ନଭେମ୍ବର ୩୦ ତାରିଖରେ ରଘୁନାଥପୁର ପାଟଣା ଗ୍ରାମର ଶିଶିର ବେହେରା ନାମକ ଜଣେ ଯୁବକ ସେହି ଗ୍ରାମର ମାନସ ନାଥଙ୍କ ଘରେ ପଶି କେହି ନଥିବାର ସୁଯୋଗ ନେଇ ତାଙ୍କ ଯୁବତୀ ଝିଅକୁ ଅସଦାଚରଣ କରିବା ସହିତ ମାରଧର କରିଥିଲା । ଏ ସଂପର୍କରେ ଆଠଗଡ ଥାନାରେ ତାଙ୍କ ପରିବାର ପକ୍ଷରୁ ଏକ ମାମଲା ରୁଜୁ କରାଯାଇଥିଲା। ପୁଲିସ ତଦନ୍ତକାରୀ ଅଧିକାରୀ ଘଟଣାର ତଦନ୍ତ କରି ଶିଶିର ବେହେରାଙ୍କ ନାମରେ ଅଭିଯୋଗ ଫର୍ଦ୍ଦ ଦାଖଲ କରିଥିଲେ। ଏସଡିଜେଏମ ଏସ୍ କୁନମୁନ ଆଚାରୀ ମାମଲାର ବିଚାର କରିବା ସମୟରେ ସମସ୍ତ ସାକ୍ଷ୍ୟ ପ୍ରମାଣ, ପୁଲିସର ଅଭିଯୋଗ ଫର୍ଦ୍ଦ ଏବଂ ସରକାରୀ ଓକିଲଙ୍କ ବଳିଷ୍ଠ ଯୁକ୍ତିକୁ ଗ୍ରହଣ କରି ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିଥିଲେ। ଏସଡିଜେଏମ ଶ୍ରୀମତୀ ଆଚାରୀ ପ୍ରକାଶ କରିଥିବା ତାଙ୍କ ରାୟରେ ଅଭିଯୁକ୍ତ ଶିଶିରକୁ ବିଭିନ୍ନ ଦଫାରେ ଏକ ବର୍ଷ ଜେଲ ଦଣ୍ଡ ଓ ୨ହଜାର ଟଙ୍କା ଜୋରିମନା ଆଦାୟ କରିବାକୁ ଆଦେଶ ଦେଇଛନ୍ତି । ଜୋରିମନା ଅନାଦେୟ ଅଧିକ ଦୁଇମାସ କାରାଦଣ୍ଡ ଭୋଗିବାକୁ ଉକ୍ତ ଆଦେଶରେ ଉଲ୍ଲେଖ ରହିଛି। ମାମଲାଟିକୁ ସରକାରଙ୍କ ପକ୍ଷରୁ ସରକାରୀ ଓକିଲ ଦୀପକ ପ୍ରସାଦ ମାନସିଂହ ଓ ସିଦ୍ଧାର୍ଥ ମହାନ୍ତି ପରିଚାଳନା କରିଥିଲେ।
Comments are closed.