ଦେଶରେ ପ୍ରଥମ: ପାର୍ଲାମେଣ୍ଟରେ ସ୍ତନ୍ୟପାନ କରାଇଲେ ଇଟାଲୀ ସାଂସଦ

​ରୋମ : ଇଟାଲୀର ନାରୀ ସ୍ବାଧୀନତା ମାନବାଧିକାର କ୍ଷେତ୍ରରେ ଏକ ମହତ୍ତ୍ବପୂର୍ଣ୍ଣ ଫର୍ଦ ​‌େ​‌ଯାଡ଼ି ହୋଇଛି। ପ୍ରଥମ ଥର ପାଇଁ ଜଣେ ମହିଳା ସାଂସଦ ସଂସଦ ଭବନରେ ନିଜ ସନ୍ତାନକୁ ସ୍ତନ୍ୟପାନ କରାଇଛନ୍ତି। ଏହାକୁ ସବୁ ରାଜନୈତିକ ଦଳର ସଦସ୍ୟମାନେ ସ୍ବାଗତ ମଧ୍ୟ କରିଛନ୍ତି। ଦେଶର ବାମପନ୍ଥୀ ବିଚାରଧାରାର ନେତ୍ରୀ ତଥା ୫-ଷ୍ଟାର ଆନ୍ଦୋଳନର ଅଗ୍ରଦୂତ ଗିଲ୍‌ଡା ସ୍ପୋର୍ଟିଏଲୋ ବୁଧବାର ପ୍ରଥମ ରାଜନୀତିଜ୍ଞ ଭାବେ ଏହି ଇତିହାସ ସୃଷ୍ଟି କରିଛନ୍ତି। ନିମ୍ନ ସଦନରେ ସଦସ୍ୟା ଥିବା ଗିଲ୍‌ଡା ନିଜର ନବଜାତ ସନ୍ତାନ ସହ ପାର୍ଲାମେଣ୍ଟକୁ ଆସିଥିଲେ। ସଂସଦୀୟ କାର୍ଯ୍ୟରେ ଅଂଶଗ୍ରହଣ ପରେ ସେ ନିଜ ଆସନରେ ବସି ଶିଶୁ ପୁତ୍ରକୁ ସ୍ତନ୍ୟପାନ କରାଇଥିଲେ। ଏହାକୁ ସମସ୍ତ ସଦସ୍ୟ ଛିଡ଼ା ହୋଇ କରତାଳି ସହ ସ୍ବାଗତ କରିଥିଲେ। ଏମିତିକି ଗିଲ୍‌ଡା ଓ ତାଙ୍କ ଶିଶୁ ପୁତ୍ରର ନିରାମୟ ଦୀର୍ଘ ଜୀବନ କାମନା କରିଥିଲେ। ପ୍ରାୟତଃ ପୁରୁଷ ପ୍ରାଧାନ୍ୟ ଦେଶ ଇଟାଲୀରେ ଜଣେ ସାଂସଦଙ୍କ ଏଭଳି କାର୍ଯ୍ୟକୁ ନିମ୍ନ ସଦନ ବାଚସ୍ପତି ହେୟଜ୍ଞାନ କରିଥିଲେ। ଉଲ୍ଲେଖଯୋଗ୍ୟ ଯେ ମହିଳା ସାଂସଦମାନଙ୍କୁ ପାର୍ଲାମେଣ୍ଟରେ ନିଜ ଶିଶୁଙ୍କୁ ସ୍ତନ୍ୟପାନ କରାଇବା ଓ ଯତ୍ନ ନେବାର ଅଧିକାର ଦେବା ପାଇଁ ଆଇନ ଆଣିବାକୁ ଗିଲ୍‌ଡା ଦାବି କରିଆସୁଥିଲେ। କେବଳ ସେତିକି ନୁହେଁ; କାର୍ଯ୍ୟକ୍ଷେତ୍ରରେ ମଧ୍ୟ ମହିଳାଙ୍କୁ ଏହି ଅଧିକାର ଦେବା ପାଇଁ ସେ ସ୍ବର ଉତ୍ତୋଳନ କରୁଥିଲେ। ଏହାକୁ ପ୍ରାୟତଃ ସମସ୍ତ ଦଳର ସାଂସଦ ସମର୍ଥନ କରୁଥିଲେ। ଗତ ବର୍ଷ ଦେଶର ପାର୍ଲାମେଣ୍ଟାରୀ ରୁଲ୍‌ସ ପାନେଲ ତାଙ୍କର ଏହି ଦାବିକୁ ଗ୍ରହଣ କରିବା ସହ ଶିଶୁକୁ ଏକ ବର୍ଷ ହେବା ଯାଏ ସଦସ୍ୟାମାନେ ପାର୍ଲାମେଣ୍ଟରେ ସ୍ତନ୍ୟପାନ କରାଇପାରିବେ ବୋଲି ସୁପାରିସ କରିଥିଲେ। ସୂଚନାଯୋଗ୍ୟ ଯେ ଜର୍ଜିଆ ମେଲୋନୀ ଗତ ଅକ୍ଟୋବରରେ ଇଟାଲୀର ପ୍ରଥମ ମହିଳା ପ୍ରଧାନମନ୍ତ୍ରୀ ହେବାର ଗୌରବ ଲାଭ କରିଥିଲେ ମଧ୍ୟ ଦୁଇ-ତୃତୀୟାଂଶ ସାଂସଦ ପୁରୁଷ। ତେର ବର୍ଷ ପୂର୍ବେ ବର୍ତ୍ତମାନର ସିନେଟର ଲିସିଆ ରୋଞ୍ଜୁଲି ଷ୍ଟ୍ରାସବର୍ଗସ୍ଥିତ ୟୁରୋପିଆନ୍‌ ପାର୍ଲାମେଣ୍ଟରେ ନିଜର ଶିଶୁ କନ୍ୟାକୁ ପ୍ରଥମେ ସ୍ତନ୍ୟପାନ କରାଇଥିଲେ।