ସମାଜ ଡିଜିଟାଲ ଡେସ୍କ: ଜି-୭ରେ ଅନ୍ତର୍ଭୁକ୍ତ ଦେଶଗୁଡିକ ଇରାନ ସହିତ ପରମାଣୁ ଚୁକ୍ତି ପାଇଁ ଆଲୋଚନା ପୁନଃ ଆରମ୍ଭ କରିବାକୁ ଦାବି କରିଛନ୍ତି । ସମସ୍ତ ୭ ସଦସ୍ୟ ରାଷ୍ଟ୍ର ପୁଣି ଥରେ ସେମାନଙ୍କର ବ୍ୟକ୍ତବ୍ୟ ଦୋହରାଇ କହିଛନ୍ତି ଯେ ଇରାନ କେବେ ହେଲେ ବି ପରମାଣୁ ଅସ୍ତ୍ର ରଖିପାରିବ ନାହିଁ ଏବଂ ଇରାନ ୟୁରାନିୟମ କାର୍ଯ୍ୟକଳାପ ବନ୍ଦ କରିବା ଉଚିତ । ଇସ୍ରାଏଲର ନିଜକୁ ରକ୍ଷା କରିବାର ପୂର୍ଣ୍ଣ ଅଧିକାର ରହିଛି । ଇସ୍ରାଏଲର ଉଦ୍ଦେଶ୍ୟକୁ ସେମାନେ ସମର୍ଥନ କରିଛନ୍ତି ।
ଜି-୭ ଦେଶଗୁଡିକର ବୟାନ ଉପରେ ଇରାନ କଡା ଜବାବ ରଖିଛି । ସେ ୟୁରାନିୟମ କାର୍ଯ୍ୟ ବନ୍ଦ କରିବ ନାହିଁ ବୋଲି କହିଛି । ପରମାଣୁ ଅପ୍ରସାର ଚୁକ୍ତିନାମା ଅନୁଯାୟୀ ଇରାନ ତା’ର ଅଧିକାର ବଜାୟ ରଖିବ । ଏକ ଅଧିକାର ଯାହାକୁ କୌଣସି ପରିସ୍ଥିତିରେ ଛଡାଇ ନିଆଯାଇପାରିବ ନାହିଁ ଏବଂ କାହାକୁ ହସ୍ତାନ୍ତର କରାଯାଇପାରିବ ନାହିଁ । ଜାତିସଂଘରେ ଇରାନର ରାଷ୍ଟ୍ରଦୂତ ଆମିର ସଇଦ ଇରାଭାନି ନିଶ୍ଚିତ କରିଛନ୍ତି ଯେ ବାହ୍ୟ ଚାପ ସତ୍ୱେ ଇରାନ ୟୁରାନିୟମ କାର୍ଯ୍ୟ ଜାରି ରଖିବ । ସେ ଆହୁରି ମଧ୍ୟ କହିଛନ୍ତି ଯେ ଇରାନ ତା’ର ପରମାଣୁ କାର୍ଯ୍ୟକ୍ରମ ବିଷୟରେ ଆଲୋଚନା କରିବାକୁ ପ୍ରସ୍ତୁତ, କିନ୍ତୁ କୌଣସି ନିଃସର୍ତ୍ତ ଆଲୋଚନା ହେବ ନାହିଁ ।
