ଆଠଗଡ: ଆଠଗଡ-ମୁଣ୍ଡଳି ଭାୟା କନ୍ଦରପୁର ରାସ୍ତା ଦେଇ ଏକ ସ୍କୁଟିରେ ଭୁବନେଶ୍ୱର ଯାଉଥିବା ଢେଙ୍କାନାଳ ଅଞ୍ଚଳର ଜଣେ ଯୁବକ ଦୁର୍ଘଟଣାର ସମ୍ମୁଖୀନ ହୋଇ ଗୁରୁତର ଆହତ ହୋଇଥିବା ଜଣାପଡିଛି । ଢେଙ୍କାନାଳ ସହରର ବାଜିଚୌକ ଅଞ୍ଚଳର ଉପେନ୍ଦ୍ର ସାହୁଙ୍କ ପୁଅ ସତ୍ୟପ୍ରକାଶ ସାହୁ ଅପରାହ୍ନ ପ୍ରାୟ ୫ଟା ବେଳେ ସେହି ରାସ୍ତା ଦେଇ ଯାଉଥିବାବେଳେ କନ୍ଦରପୁର ନିକଟବର୍ତ୍ତୀ ରାଉତରାପୁର ଗଡାରେ ଏକ ବାର୍ହା ରାସ୍ତା ପାର ହେଉଥିବାବେଳେ ସ୍କୁଟିରେ ପିିଟି ହୋଇଯାଇଥିଲା । ସ୍କୁଟିଟି ଭାରସାମ୍ୟ ହରାଇ ରାସ୍ତାକଡକୁ ଲେଉଟି ପଡିଥିବାବେଳେ ସତ୍ୟପ୍ରକାଶଙ୍କ ଗୋଡ ମଧ୍ୟରେ ସ୍କୁଟିର ଲୁହାଷ୍ଟାଣ୍ଡଟି ପଶି ରହିଯାଇଥିଲା। କନ୍ଦରପୁରର ପୂର୍ବତନ ସରପଞ୍ଚ ବିଚିତ୍ରାନନ୍ଦ ସେଠୀ ଓ ସ୍ଥାନୀୟ ରାଉତରାପୁର ଅଞ୍ଚଳର ଲୋକେ ତାଙ୍କୁ ଉଦ୍ଧାର କରିଥିଲେ ମଧ୍ୟ ଗୋଡଭିତରେ ସ୍କୁଟି ଷ୍ଟାଣ୍ଡ ପଶି ରହିଯାଇଥିବାରୁ ତାଙ୍କୁ ଡାକ୍ତରଖାନା ନେଇପାରିନଥିଲେ। ସେମାନେ ଦମକଳ ବାହିନୀକୁ ଖବର ଦେବା ପରେ ଦମକଳ ବାହିନୀ ସେଠାରେ ପହଞ୍ଚି ଗ୍ୟାସକଟର ସାହାଯ୍ୟରେ ସ୍କୁଟିରୁ ଷ୍ଟାଣ୍ଡଟିକୁ କାଟି ସତ୍ୟପ୍ରକାଶକୁ ଗୁରୁତର ଅବସ୍ଥାରେ ୧୦୮ରୋଗୀବୁହା ଯାନରେ ଆଠଗଡ ଡାକ୍ତରଖାନାକୁ ନେଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ଗୋଡରୁ ଷ୍ଟାଣ୍ଟଟିକୁ ବାହାର କରିବା ସମ୍ଭବ ନଥିବାରୁ ତାଙ୍କୁ ଚିକିତ୍ସା କରୁଥିବା ଡାକ୍ତର ସୁବାସ ପାତ୍ରଙ୍କ ପରାମର୍ଶକ୍ରମେ ତୁରନ୍ତ କଟକ ବଡ ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି।
Comments are closed.