କଳାହାଣ୍ଡି: ଭୁଶୁଡିଗଲା କେନାଲ, ବୁଡିଗଲା ଘର । କଳାହାଣ୍ଡି କଲମପୁର ବ୍ଲକରେ ଇନ୍ଦ୍ରାବତୀ ଦକ୍ଷିଣ କେନାଲରେ ୨୦ ଫୁଟର ଏକ ଘାଇ ସୃଷ୍ଟି ହୋଇଛି। ଏବଂ ଏଥିପାଇଁ ବୁଡି ଯାଇଛି ଆଖପାଖ ଅଞ୍ଚଳ। ଆଜି(ସୋମବାର) ଭୋର୍ ସମୟରେ ହଠାତ୍ କେନାଲରେ ଘାଇ ସୃଷ୍ଟି ହୋଇଥିଲା। ଏବଂ ଚାହୁଁ ଚାହୁଁ ପୁରା ଅଞ୍ଚଳକୁ ପାଣି ମାଡି ଯାଇଥିଲା। ପରିସ୍ଥିତି ଏପରି ହୋଇଥିଲା ଯେ, ଲୋକ ଘରେ ଥିବା ସମୟରେ କିଛି ସେକେଣ୍ଡ ମଧ୍ୟରେ ପାଣି ବେକ ପର୍ଯ୍ୟନ୍ତ ଚାଲିଆସିଥିଲା। ଘରର ଆଜବେଷ୍ଟ ଭାଙ୍ଗି ବାହାରକୁ ଆସିଥିଲେ। ଗାଁ ଭିତରେ ପାଣି ଚଳାଚଳ ଯୋଗୁଁ ଜୁନାଗଡ଼ ରୁ କଲମପୁର ମଧ୍ୟରେ ଯାତାୟାତ ବାଧାପ୍ରାପ୍ତ ହେଇଥିଲା। କେନାଲ ବନ୍ଧ ଭାଙ୍ଗିବା ପରେ ଗାଁ ରାସ୍ତାରେ ୫ ଫୁଟର ପାଣି ଚାଲିଛି। ଲୋକଙ୍କ ଘରେ ପାଣି ପଶି ଅନେକ ଆସବାବପତ୍ର ନଷ୍ଟ ହୋଇଯାଇଛି। ପ୍ରାୟ ୩୦୦ କୋଟି ଟଙ୍କା ବ୍ୟୟରେ ଦକ୍ଷିଣ ମୁଖ୍ୟ କେନାଲ ଦୁଇବର୍ଷ ଧରି ମରାମତି ଚାଲିଛି। ହେଲେ ସମ୍ପୃକ୍ତ ସ୍ଥାନରେ ଆଦୌ ମରାମତି ହୋଇନାହିଁ। ଫଳରେ ପୁରୁଣା ହୁଡ଼ା ରେ ନିୟମିତ ପାଣି ଝରି ଝରି କେନାଲ ବନ୍ଧ ଭାଙ୍ଗିଥିବା ଗାଁ ଲୋକେ ଅଭିଯୋଗ କରିଛନ୍ତି। ଅନ୍ୟପକ୍ଷରେ କେନାଲ ରେ ଗେଟ ବନ୍ଦ କରି ପାଣି ଉଠାଇ କିଛି ଚାଷୀ ନିଜ ଜମି କୁ ପାଣି ନେଉଛନ୍ତି। ଏଣୁ ଆବଶ୍ୟକତା ରୁ ଅଧିକ ପାଣି ରହିବା ଯୋଗୁଁ ପାଣି ଝରିବା ସ୍ଥାନରେ ଘାଇ ସୃଷ୍ଟି ହେଇଥିବା ବିଭାଗୀୟ ସୂତ୍ରରୁ ପ୍ରକାଶ ପାଇଛି। ତେବେ ଆସନ୍ତା ଦିନ ଦୁଇ ଦିନ ମଧ୍ୟରେ ଘାଇ ମରାମତି କରାଯାଇ କେନାଲ ରେ ଜଳସେଚନ ର ବ୍ୟବସ୍ଥା କରାଯିବ ବୋଲି ସୂଚନା ମିଳିଛି।
Popular Categories
Previous article
Next article