ମାତାରାମ : ଇଣ୍ଡୋନେସିଆର ଲୋମ୍ବୋକ ଦ୍ୱୀପରେ ରବିବାର ଘଟିଥିବା ଭୂକମ୍ପ ଯୋଗୁ ଜନିତ ମୃତ୍ୟୁ ସଂଖ୍ୟା ୧୩୧ରେ ପହଞ୍ଚିଛି। ପ୍ରାୟ ୧,୪୭୭ ଲୋକ ଗୁରୁତର ଆହତ ହୋଇଛନ୍ତି। ଏହି ଭୟଙ୍କର ଭୂକମ୍ପ ଯୋଗୁ ପର୍ଯ୍ୟଟନ ପାଇଁ ପ୍ରସିଦ୍ଧ ଏହି ଦ୍ୱୀପରେ ନାହିଁ ନ ଥିବା କ୍ଷୟକ୍ଷତି ଘଟିଛି। ହଜାରହଜାର ବାସଗୃହ ଭୁଶୁଡି ପଡିଥିବା ବେଳେ ୧,୫୬,୦୦୦ରୁ ଊର୍ଦ୍ଧ୍ବ ଲୋକ ବିସ୍ଥାପିତ ହୋଇଛନ୍ତି। କ୍ଷତିଗ୍ରସ୍ତ ଡାକ୍ତରଖାନା ବାହାରେ ଆହତଙ୍କ ଚିକିତ୍ସା ଜାରି ରହିଛି। ପରିସ୍ଥିତିକୁ ଦୃଷ୍ଟିରେ ରଖି ସ୍ଥାନୀୟ ପ୍ରଶାସନ ଅତିରିକ୍ତ ଡାକ୍ତରୀ ସହାୟତା ଲୋଡିଛି। ବାସଗୃହ, ସ୍କୁଲ ଏବଂ ମସ୍ଜିଦ୍ର ଧ୍ୱଂସାବଶେଷ ତଳେ ଏବେ ବି ନିଖୋଜ ଲୋକଙ୍କ ସନ୍ଧାନ ଜାରି ରହିଛି। ରବିବାର ସନ୍ଧ୍ୟା ସମୟରେ ସମଗ୍ର ଲୋମ୍ବୋକ ଦ୍ୱୀପ ତୀବ୍ରତା ୭.୦ ବିଶିଷ୍ଟ ଭୂକମ୍ପ ଯୋଗୁ ଥରି ଉଠିଥିଲା। ଅନ୍ୟପଟେ ପ୍ରାୟ ୧୦୦ରୁ ଊର୍ଦ୍ଧ୍ବଥର ଭୂକମ୍ପ ପରବର୍ତ୍ତୀ ଝଟ୍କା ଅନୁଭୂତ ହୋଇଥିଲା। ରାଷ୍ଟ୍ରପତି ଜୋକୋ ୱିଡୋଡୋ ଗଭୀର ଦୁଃଖ ପ୍ରକାଶ କରିବା ସହିତ ମୃତକଙ୍କ ପରିବାର ତଥା ଆହତମାନଙ୍କ ନିମନ୍ତେ ସେ ସରକାରୀ ସହାୟତା ଘୋଷଣା କରିଛନ୍ତି।
