ସମାଜ ଡିଜିଟାଲ ଡେସ୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଫ୍ରାନ୍ସ ଗସ୍ତର ୩ୟ ଦିବସ ବୁଧବାର ମାର୍ସିଲେ ସହରରେ ଭାରତର ନୂତନ ମହାବାଣିଜ୍ୟ ଦୂତାବାସ ଉଦଘାଟିତ ହୋଇଛି। ପ୍ରଧାନମନ୍ତ୍ରୀ ମୋଦୀ ଏବଂ ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରନ ମିଳିତ ଭାବେ ଏହାକୁ ଉଦଘାଟନ କରିଛନ୍ତି। ଏହି ଅବସରରେ ସେଠାରେ ଉପସ୍ଥିତ ଅନ୍ୟ ପ୍ରବାସୀ ଭାରତୀୟମାନେ କରତାଳି ଦେଇ ସ୍ବାଗତ କରିଥିଲେ। ପ୍ରଧାନମନ୍ତ୍ରୀ ମୋଦୀ ଫ୍ରାନ୍ସ ସେନାକୁ ଭାରତରେ ନିର୍ମିତ ପିନାକା ମଲ୍ଟି ବ୍ୟାରେଲ ଲଞ୍ଚର ଦେଖିବାକୁ ଆମନ୍ତ୍ରିତ କରିଥିଲେ।
ଏହା ପୂର୍ବରୁ ପ୍ରଧାନମନ୍ତ୍ରୀ ମାର୍ସିଲେ ସହରର ଐତିହାସିକ ମଜାରଗ ଯୁଦ୍ଧ ସମାଧିସ୍ଥଳ ପରିଦର୍ଶନ କରିବା ସହିତ ପ୍ରଥମ ବିଶ୍ଵଯୁଦ୍ଧରେ ସହିଦ ହୋଇଥିବା ଭାରତୀୟ ସୈନିକମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ଏହି ଯୁଦ୍ଧ ସ୍ମାରକକୁ ରାଜ୍ୟଗୋଷ୍ଠୀ ଯୁଦ୍ଧ ସମାଧି ଆୟୋଗ ଦ୍ବାରା ସଂରକ୍ଷିତ କରାଯାଇଛି।
