ନୂଆଦିଲ୍ଲୀ: ସେନାବାହିନୀ ନିୟନ୍ତ୍ରଣ ରେଖା ଓ ଆନ୍ତର୍ଜାତିକ ସୀମାରେ କଡ଼ା ପହରା ଦେଉଛି। ପାକିସ୍ତାନ ଦ୍ୱାରା ଯେକୌଣସି ଦୁଃସାହସିକ କାର୍ଯ୍ୟର ପରିଣାମ ଭୟାବହ ହେବ ଓ ଏହାର ଠିକଣା ଜବାବ ଦିଆଯିବ ବୋଲି ପ୍ରତିରକ୍ଷା ମନ୍ତ୍ରଣାଳୟ କହିଛି। ଆବାସିକ ଅଞ୍ଚଳକୁ ଲକ୍ଷ୍ୟ କରି ଆକ୍ରମଣ ନ କରିବା ପାଇଁ ସେନାବାହିନୀ ପାକିସ୍ତାନକୁ ଚେତାବନୀ ଦେବା ପରେ ନିୟନ୍ତ୍ରଣ ରେଖାରେ ପରିସ୍ଥିତି ଶାନ୍ତ ରହିଛି। ତେବେ ପାକିସ୍ତାନ ସେନାବାହିନୀ ଦ୍ୱାରା କ୍ରିଷ୍ଣାଘାଟୀ ଓ ସୁନ୍ଦରବନି ଅଞ୍ଚଳର କିଛି ନିର୍ଦ୍ଦିଷ୍ଟ ସ୍ଥାନ ଉପରେ ଗୁଳିଗୋଳା ବର୍ଷଣ କରାଯାଇଥିଲା। ସେମାନେ ଭାରତୀୟ ଘାଟୀ ଓ ଆବାସିକ ଅଞ୍ଚଳକୁ ଲକ୍ଷ୍ୟ କରି ଆକ୍ରମଣ କରିଥିଲେ ଓ ସେନାବାହିନୀ ଦ୍ୱାରା ପ୍ରତ୍ୟାକ୍ରମଣ କରାଯାଇଥିଲା। ସେନାବାହିନୀ ଏକ ବିବୃତ୍ତିରେ କହିଛି, ପ୍ରତିରକ୍ଷା ବାହିନୀଗୁଡ଼ିକ ଦ୍ୱାରା ନିଆଯାଉଥିବା ପ୍ରତ୍ୟେକଟି ପଦକ୍ଷେପ କେବଳ ଆତଙ୍କବାଦୀ ଓ ସେମାନଙ୍କର ମୌଳିକ ଢାଞ୍ଚାକୁ ଲକ୍ଷ୍ୟ କରି କରାଯାଉଛି।
