ନୀଳଗିରି: ନୀଳଗିରି ଅବକାରୀ ପୁଲିସ ଶନିବାର ଔପଦା ଥାନା ଅଞ୍ଚଳରେ ଚାଲିଥିବା ଏକ ନକଲି ମଦ କାରଖାନା ଉପରେ ଚଢ଼ଉ କରି କାରଖାନାର ମାଲିକକୁ ଗିରଫ କରିଛି । ଦୀର୍ଘ ପ୍ରାୟ ୬ବର୍ଷ ଧରି ଏହି ନକଲି ମଦ କାରଖାନା ଚାଲିଥିଲା। ଏଠାରେ ନକଲି ମଦ ପ୍ରସ୍ତୁତ ପରେ ଏସବୁ ବାଲେଶ୍ୱର ଓ ମୟୂରଭଞ୍ଜ ଜିଲାର ବିଭିନ୍ନ ଅଞ୍ଚଳକୁ ଚାଲାଣ କରାଯାଉଥିଲା। ଏ ନେଇ ଖବରପାଇ ନୀଳଗିରି ଅବକାରୀ ଇନ୍ସପେକ୍ଟର କେଶବ ଚନ୍ଦ୍ର ଦାସ ଔପଦା ଥାନା ବଡ଼ପୋଖରୀ ଗାଁରେ ଥିବା ଏହି କାରଖାନା ଉପରେ ସଦଳବଳ ଚଢ଼ଉ କରିଛନ୍ତି । କାରଖାନା ମାଲିକ ତଥା ଉକ୍ତ ଗାଁର ମନୋଜ ବେହେରା(୩୩)ଙ୍କୁ ଗିରଫ କରାଯାଇଛି ।
ଅଭିଯୁକ୍ତ ମନୋଜ ୨୦୧୯ରୁ ଅର୍ଥାତ ଲକଡାଉନଠାରୁ ଏହି କାରବାରରେ ସମ୍ପୃକ୍ତି ଥିବା ସ୍ୱୀକାର କରିଛି। ଏହି ମଦ ସବୁ ଔପଦା, ନୀଳଗିରି, ସୋର, ସିମୁଳିଆ, ଖଇରା ସମେତ ବେତେଇ ରାସ୍ତା ଦେଇ ମୟୂରଭଞ୍ଜ ଜିଲାର କପ୍ତିପଦା, ଶରତ, ଠାକୁରମୁଣ୍ଡା, ଉଦଳା ପ୍ରଭୃତି ଅଞ୍ଚଳକୁ ଚାଲାଣ କରାଯାଉଥିଲା। ନକଲି ମଦ ସବୁ ଆଦିବାସୀ ଇଲାକାରେ ବହୁଳମାତ୍ରାରେ ବିକ୍ରି ହେଉଥିଲା । ଅଭିଯୁକ୍ତ ମନୋଜଠାରୁ ୧୦୦ଲିଟର ସ୍ପିରିଟ, ୩୬ଲିଟର ନକଲି ମଦ, ୧୨୦ଟି ଖାଲି ବୋତଲ, ଠିପି, ସରକାରୀ ଲେବୁଲ ସହ ବ୍ୟବହୃତ ଏକ କାରକୁ ଜବତ କରାଯାଇଛି। ଚଢ଼ଉରେ ନୀଳଗିରି ଅବକାରୀ ଓଆଇସି ମନୋଜ ସାହୁ, ଖଇରା ଓଆଇସି ସୂରଜ ଟିଗା, କନଷ୍ଟେବଳ ତପନ ମଲିକ, ଦେବାଶିଷ ମଲିକ, ସନ୍ତୋଷ ବେହେରା, ନହନ ମୁର୍ମୁ ପ୍ରମୁଖ ସାମିଲ ଥିଲେ।
