ଅନୁଗୋଳ: ଅନୁଗୋଳ ଜିଲ୍ଲା ରେଙ୍ଗାଳୀ ଥାନା ଅନ୍ତର୍ଗତ କରଡ଼ାଖମନ ଗ୍ରାମରେ ଘଟିଛି ଏକ ଅଘଟଣ। ପେଟ୍ରୋଲ ନିଆଁରେ ପୋଡ଼ି ହୋଇ ଜଣେ ଗୁରୁତର ହୋଇଥିବା ଜଣାପଡ଼ିଛି। ଗୁରୁତର ଜଣକ ହେଲେ ରେଙ୍ଗାଳୀ ଥାନା ଅନ୍ତର୍ଗତ କରଡ଼ାଖମନ ଗ୍ରାମର ସନାତନ ସାହୁଙ୍କ ପୁଅ ବନୋଜ ସାହୁ (୨୪)।
ସୂଚନା ମୁତାବକ, କରଡାଖମନ ଗ୍ରାମର ସନାତନ ସାହୁଙ୍କ ପୁଅ ବନୋଜ ସାହୁ ଗ୍ରାମରେ ଏକ ରାସନ ଦୋକାନ ଦେଇଛନ୍ତି। ଶନିବାର ଅପରାହ୍ନ ପ୍ରାୟ ୨ଟା ବେଳେ ଦୋକାନ ପାଇଁ ରାସନ କିଣିବାକୁ ବନୋଜ ବାଇକ୍ ଯୋଗେ ବାହାରି ଥିଲେ। ବାହାରିବା ପୂର୍ବରୁ ବାଇକରେ ପେଟ୍ରୋଲ ପକାଇଲା ବେଳେ ଅସାବଧାନତା ପାଇଁ ପେଟ୍ରୋଲ ବନୋଜଙ୍କ ଉପରେ ଏବଂ ତଳେ ଢାଳି ଯାଇଥିଲା। ପାଖରେ ଏକ ଅଳିଆ ଗଦାରେ ନିଆଁ ଜଳୁଥିବାରୁ ହଠାତ ବନୋଜଙ୍କ ଦେହରେ ନିଆଁ ଲାଗି ଯାଇଥିଲା। ତୁରନ୍ତ ତାଙ୍କୁ ଆମ୍ବୁଲାନ୍ସ ଯୋଗେ ଡାକି ଖମାର ଚିକିତ୍ସାଳୟକୁ ନିଆଯାଇଥିଲା। ଖମାରରେ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ପୁଣି ଆମ୍ବୁଲାନ୍ସ ଯୋଗେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ଜିଲ୍ଲା ମୁଖ୍ୟ ଚିକିତ୍ସାଳୟରେ ବନୋଜଙ୍କର ଚିକିତ୍ସା କରାଯାଉଛି। ବନୋଜଙ୍କର ୭୦ ପ୍ରତିଶତ ପୋଡିଯାଇଥିବା ଡାକ୍ତର କହିଛନ୍ତି। ଏପଟେ ସେହି ନିଆଁରେ ବନୋଜ ଦେଇଥିବା ରାସନ ଦୋକାନଟି ମଧ୍ୟ ସମ୍ପୂର୍ଣ୍ଣ ପୋଡି ଯାଇଥିବା ବନୋଜଙ୍କ ବାପା ସନାତନ ସାହୁ କହୁଛନ୍ତି।
