ହାଇଦାରାବାଦ : ଦଳିତ ବର୍ଗର ଜଣେ ବ୍ୟକ୍ତିଙ୍କୁ ତାଙ୍କ ଗର୍ଭବତୀ ପତ୍ନୀଙ୍କ ସମ୍ମୁଖରେ ହତ୍ୟା ଘଟଣାର ୫ ଦିନ ପରେ ହାଇଦରାବାଦରେ ପୁଣି ସମ୍ମାନ ଆଳରେ ହତ୍ୟା (ଅନର କିଲିଂ) ଉଦ୍ୟମ ହୋଇଛି। ନବଦମ୍ପତିଙ୍କ ଉପରେ ଏକ ଦାଆରେ ଆକ୍ରମଣ କରିଛନ୍ତି ନବବଧୂଙ୍କ ପିତା। ହାଇଦରାବାଦର ଏସ୍ଆର୍ ନଗରଠାରେ ବୁଧବାର ସନ୍ଧ୍ୟାରେ ହୋଇଥିବା ଏହି ଆକ୍ରମଣରେ ନବଦମ୍ପତି ସନ୍ଦୀପ ଓ ମାଧବୀ ଗୁରୁତର ଆହତ ହୋଇଛନ୍ତି। ସନ୍ଦୀପଙ୍କ ପିଠିରେ ଗଭୀର କ୍ଷତ ସୃଷ୍ଟି ହୋଇଥିବା ବେଳେ ମାଧବୀଙ୍କ ହାତ ପ୍ରାୟତଃ କଟିଯାଇଛି। ପୁଲିସର ସୂଚନା ଅନୁସାରେ ୨୧ ବର୍ଷ ବୟସ୍କ ସନ୍ଦୀପ ଅନୁସୂଚିତ ବର୍ଗର ଏବଂ ମାଧବୀ ପଛୁଆ ବର୍ଗର ଝିଅ। ଏକ ମାସ ପୂର୍ବେ ଏଠାକାର ଆର୍ଯ୍ୟସମାଜ ମନ୍ଦିରରେ ସେମାନେ ବିବାହ କରିଥିଲେ। ପରିବାର ଲୋକେ ଏହି ବିବାହକୁ ବିରୋଧ କରିବା ସହିତ ନବଦମ୍ପତିଙ୍କୁ ଧମକ ଦେଇଥିଲେ। ବୁଧବାର ସକାଳେ ଝିଅକୁ ଦେଖାକରିବାକୁ ଚାହୁଁଛନ୍ତି ବୋଲି ମାଧବୀଙ୍କ ପିତା ସନ୍ଦୀପଙ୍କୁ କହିଥିଲେ। ଏଆର୍ ନଗରଠାରେ ପହଞ୍ଚିବା ପରେ ସେମାନଙ୍କ ଉପରେ ସେ ଆକ୍ରମଣ କରିଥିଲେ। ଏହି ଆକ୍ରମଣ ଘଟଣା ଉକ୍ତ ସ୍ଥାନରେ ଥିବା ସିସିଟିଭି କ୍ୟାମେରାରେ କଏଦ ହୋଇଛି। ଆକ୍ରମଣ ପରେ ମାଧବୀ ଓ ସନ୍ଦୀପଙ୍କୁ ଆହତ ଅବସ୍ଥାରେ ଯଶୋଦା ହସ୍ପିଟାଲରେ ଭର୍ତ୍ତିକରାଯାଇଛି। ପୁଲିସ ଏକ ମାମଲା ରୁଜୁ କରି ତଦନ୍ତ ଚଳାଇଛି।
