କଲକାତା : ପତ୍ନୀଙ୍କ କଥାରେ ନିଜର କିଡ୍ନୀ ବିକ୍ରି କରିଥିବା ଜଣେ ବ୍ୟକ୍ତିଙ୍କୁ ଚରମ ଦୁର୍ଦ୍ଦଶା ଭୋଗିବାକୁ ପଡିଛି। ଘଟଣାଟି ପଶ୍ଚିମବଙ୍ଗ ହାୱଡା ଜିଲାର ସାଙ୍କ୍ରେଲ ସହରରେ ଘଟିଛି। ଏଠାରେ ଜଣେ ବ୍ୟକ୍ତି ପତ୍ନୀ ଓ ୧୦ ବର୍ଷର କନ୍ୟା ସହ ବାସ କରୁଛନ୍ତି। ବିଗତ କିଛି ଦିନ ଧରି ମହିଳା ଜଣକ କିଡ୍ନୀ ବିକ୍ରି କରିବାକୁ ସ୍ବାମୀଙ୍କୁ ପ୍ରବର୍ତ୍ତାଉଥିଲେ। ଏହି ଅର୍ଥରେ କନ୍ୟାର ଶିକ୍ଷା ଓ ବିବାହ ଖର୍ଚ୍ଚ ତୁଲାଇବା ସମ୍ଭବ ହୋଇପାରିିବ ବୋଲି ସେ ଯୁକ୍ତି ଦର୍ଶାଇଥିଲେ।
ପ୍ରଥମେ ଅରାଜି ହୋଇଥିଲେ ସୁଦ୍ଧା ସ୍ବାମୀ ଜଣକ ଶେଷରେ ପତ୍ନୀଙ୍କ କଥାରେ ସମ୍ମତି ପ୍ରଦାନ କରିଥିଲେ। କିଡ୍ନୀ ଆବଶ୍ୟକ କରୁଥିବା ଲୋକଙ୍କୁ ଠାବ କରାଯିବା ପରେ ବ୍ୟକ୍ତିଜଣକ ୧୦ ଲକ୍ଷ ଟଙ୍କାରେ ନିଜର ଗୋଟିଏ କିଡ୍ନୀ ବିକ୍ରି କରିଥିଲେ। ହାତକୁ ଟଙ୍କା ଆସିବା ପରେ ବ୍ୟକ୍ତିଜଣକ ଆଶ୍ବସ୍ତି ପ୍ରକାଶ କରିବା ସହ ପତ୍ନୀଙ୍କ ଦୂରଦୃଷ୍ଟିକୁ ପ୍ରଶଂସା କରିଥିଲେ। ତେବେ ଏହା ପଛରେ ଏକ ଷଡଯନ୍ତ୍ର ରହିଥିବା ସ୍ବାମୀଜଣକ ସ୍ବପ୍ନରେ ଭାବି ନଥିଲେ। ପରବର୍ତ୍ତୀ ସମୟରେ ମହିଳା ଜଣକ ୧୦ ଲକ୍ଷ ଟଙ୍କା ଧରି ପ୍ରେମିକ ସହ ଚମ୍ପଟ ମାରିଥିବା ଜଣାପଡିଛି। ଜଣେ ରଙ୍ଗ ମିସ୍ତ୍ରୀ ସହ ମହିଳାଙ୍କର ଫେସବୁକ୍ରେ ପ୍ରେମସମ୍ପର୍କ ସ୍ଥାପନ ହୋଇଥିଲା। ପ୍ରତାରଣାର ଶିକାର ପାଲଟି ଥିବା ସ୍ବାମୀ ବର୍ତ୍ତମାନ ଥାନାରେ ଏତଲା ଦାଏର କରିଛନ୍ତି।
