କେନ୍ଦୁଝରଗଡ଼଼ : ଚଳିତମାସ ୮ ତାରିଖରୁ କେନ୍ଦୁଝର ହ୍ୟାଣ୍ଡବଲ୍ ପଡ଼ିଆରେ ଆୟୋଜିତ ୩୯ତମ ସବ୍ଜୁନିୟର ଜାତୀୟ ବାଳକ ହ୍ୟାଣ୍ଡବଲ ଚମ୍ପିଆନସିପ୍ ଶନିବାର ପୂର୍ବାହ୍ନରେ ଉଦ୍ଯାପିତ ହୋଇଯାଇଛି। ଶନିବାର ଅନୁଷ୍ଠିତ ସେମିଫାଇନାଲ ମ୍ୟାଚରେ ଉତ୍ତରପ୍ରଦେଶ-ଓଡ଼ିଶାକୁ ୩୬-୩୧ ଗୋଲରେ ଏବଂ ରାଜସ୍ଥାନ ହରିୟାନାକୁ ୨୭-୨୩ ଗୋଲରେ ପରାସ୍ତ କରି ଫାଇନାଲରେ ପ୍ରବେଶ କରିଥିଲା। ଫାଇନାଲ ମ୍ୟାଚରେ ଉତ୍ତରପ୍ରଦେଶ ଦଳ ରାଜସ୍ଥାନକୁ ୩୧-୩୦ ଗୋଲରେ ପରାସ୍ତ କରି ଚମ୍ପିଆନ ଆଖ୍ୟା ଅର୍ଜନ କରିଛି।
ଓଡ଼ିଶା ଓ ହରିୟାନା ଯୁଗ୍ମ ତୃତୀୟସ୍ଥାନ ହାସଲ କରିଥିବା ବେଳେ ପ୍ରଥମଥର ପାଇଁ ଓଡିଶା ଦଳ କାଂସ୍ୟ ପଦକ ହାସଲ କରିଛି। ଆରକ୍ଷୀ ଅଧିକ୍ଷକ ନିତିନ କୁଶଲକର, କେନ୍ଦୁଝର ବନଖଣ୍ଡ ଅଧିକାରୀ ଧନରାଜ ଏଚ.ଡି, ସମାଜସେବୀ ଭଗବାନ ସ୍ୱାଇଁ, ରାଜ୍ୟ ହ୍ୟାଣ୍ଡବଲ ସଂଘ ସଭାପତି ବିପ୍ଳବ ଚୌଧୁରୀ ଓ ସମ୍ପାଦକ ମାନସ ସିଂ, କେନ୍ଦୁଝର ଜିଲା ହ୍ୟାଣ୍ଡବଲ ସଂଘ ସଭାପତି ଇଂ ବସନ୍ତ କୁମାର ଦାନୀ, ସମ୍ପାଦକ ଋିତିକ ଅଧିକାରୀ ଓ କୋଷାଧ୍ୟକ୍ଷ ଦୟାସାଗର ପଣ୍ଡା ପ୍ରମୁଖ ଅତିଥି ଭାବେ ଯୋଗଦେଇ ବିଜୟୀ ଦଳକୁ ଚମ୍ପିଆନ ଟ୍ରଫି ଓ ରନର୍ସଅପ ଦଳକୁ ରନର୍ସଅପ ଟ୍ରଫି ପ୍ରଦାନ ପୂର୍ବକ ପୁରସ୍କୃତ କରିଥିଲେ।
ସନ୍ଦୀପ ବଲୋଦା, ଅମିତ ପାଣ୍ଡେ, ରାହୁଲ, ନିତେଶ ଡାଗର, ମୋହିତ, ଜିତେନ୍ଦ୍ର, ଧୂରେନ୍ଦ୍ର ଡାଗର, ଭଗବାନ ସିଂ, ଇମତିୟାଜ, ସମିମ, ବର୍ଷା ସେଠୀ ଓ ଜ୍ୟୋତି ପାତ୍ର ପ୍ରମୁଖ ରେଫରୀ ଭାବେ ଖେଳ ପରିଚାଳନା କରିଥିବା ବେଳେ ସମ୍ମିତା ବିଶ୍ୱାଳ ଓ ମମତା ନାଏକ ସହଯୋଗ କରିଥିଲେ। କେନ୍ଦୁଝରର ଖେଳ ପଡ଼ିଆ, ପରିବେଶ, କ୍ରୀଡାପ୍ରେମୀ ଏବଂ ପ୍ରତିଯୋଗିତାର ସଫଳ ଆୟୋଜନକୁ ପ୍ରତିଯୋଗିତାରେ ଅଂଶଗ୍ରହଣ କରିଥିବା ବାହାର ରାଜ୍ୟର ଖେଳାଳୀ ଭୂୟସୀ ପ୍ରଶଂସା କରିଥିଲେ।
ଜାତୀୟ ଜୁନିୟର ହ୍ୟାଣ୍ଡବଲ ଦଳର ଯୁଗ୍ମପ୍ରଶିକ୍ଷକ ତଥା କେନ୍ଦୁଝରର ବରିଷ୍ଠ ହ୍ୟାଣ୍ଡବଲ ଖେଳାଳୀ ଓ ରେଫରୀ ପ୍ରଣୟ କୁମାର ପାଣିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଜାତୀୟସ୍ତରର ଏହି ପ୍ରତିଯୋଗିତା ସୁଚାରୁରୂପେ ସମ୍ପର୍ଣ୍ଣ ହୋଇଥିଲା।
Comments are closed.