ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ୨୦୨୨ ସୁଦ୍ଧା ଦେଶର କୌଣସି ଲୋକ ବାସହୀନ ହୋଇ ରହିବେ ନାହିଁ। ସେ କହିଛନ୍ତି, ପ୍ରଧାନମନ୍ତ୍ରୀ ଆବାସ ଯୋଜନାରେ ଯେଉଁମାନେ ଘର ପାଇନାହାନ୍ତି, ଦିନେ ସେମାନଙ୍କୁ ନିଶ୍ଚିତ ଘର ମିଳିବ। କାନପୁରଠାରେ ଏକ ରାଲିରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି, ଏହି ଯୋଜନାରେ ୧କୋଟି ୫୦ଲକ୍ଷ ବାସଗୃହ ନିର୍ମାଣ କରାଯାଇଛି ଓ ୨୦୧୭ମସିହାରେ ଉତ୍ତର ପ୍ରଦେଶରେ ସରକାର ପରିବର୍ତ୍ତନ ହେବା ପରେ ସେଠାରେ ବାସଗୃହ ନିର୍ମାଣ ତ୍ୱରାନ୍ୱିତ ହୋଇଛି। କାଶ୍ମୀର ଲୋକମାନଙ୍କ ଉପରେ ହୋଇଥିବା ଆକ୍ରମଣର ସମାଲୋଚନା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଆମେ ବର୍ତ୍ତମାନ ଏକତା, ସଦଭାବନା ଓ ଭ୍ରାତୃଭାବ ଚାହୁଁ। ସେ କହିଛନ୍ତି, କିଛି ଦୁର୍ବୃତ୍ତ କାଶ୍ମୀର ଭାଇମାନଙ୍କ ଉପରେ ଆକ୍ରମଣ କରିଛନ୍ତି, ତେବେ ରାଜ୍ୟ ସରକାର ଦ୍ରୁତଗତିରେ ପଦକ୍ଷେପ ନେଇଛନ୍ତି। ପାକିସ୍ତାନର ସମାଲୋଚନା କରି ପ୍ରଧାନମନ୍ତ୍ରୀ କହିଛନ୍ତି, ଆତଙ୍କବାଦକୁ ସାହାଯ୍ୟ ସମର୍ଥନ କରୁଥିବା ସମୟରେ ପାକିସ୍ତାନ ଧରାପଡିଛି ଓ ସମଗ୍ର ବିଶ୍ୱ ତାହାର ସମାଲୋଚନା କରୁଛନ୍ତି। କିନ୍ତୁ ବିରୋଧୀ ଦଳମାନେ ଦେଉଥିବା ମନ୍ତବ୍ୟକୁ ପାକିସ୍ତାନ ଭାରତ ବିରୋଧରେ ବ୍ୟବହାର କରୁଛି।
Pay Online