ଶ୍ରୀନଗର: ଅମରନାଥ ଯାତ୍ରାରେ ଆସୁଥିବା ଭକ୍ତମାନେ ଆମର ଅତିଥି, ଶତ୍ରୁ ନୁହନ୍ତି। ଏଭଳି ଆଶ୍ଚର୍ଯ୍ୟଜନକ ଓ ଚାଞ୍ଚଲ୍ୟକର ଘୋଷଣା ଶୁଣିବାକୁ ମିଳିଛି ଦୁର୍ଦ୍ଦାନ୍ତ ଆତଙ୍କବାଦୀ ସଂଗଠନ ହିଜ୍ବୁଲ୍ ମୁଜାହିଦ୍ଦିନ ପକ୍ଷରୁ।
ହିଜ୍ବୁଲ୍ ମୁଜାହିଦ୍ଦିନ୍ କମାଣ୍ଡର ରିୟାଜ୍ ନାଇକୋ ଏକ ଭିଡିଓରେ ଏହି ବାର୍ତ୍ତା ଦେଇଛନ୍ତି। ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ଏହି ଭିଡିଓରେ ଅମରନାଥ ଯାତ୍ରୀଙ୍କ ଉପରେ ଏକ ବଡ଼ ଧରଣର ଆକ୍ରମଣ ଯୋଜନା ହେଉଥିବା ଅଭିଯୋଗକୁ ଅସ୍ୱୀକାର କରିବା ସହିତ ନାଇକୋ କହିଛନ୍ତି ଯେ ଅମରନାଥ ଯାତ୍ରୀମାନେ ଧର୍ମ ଭାବନା ନେଇ ଆସୁଛନ୍ତି। ତେଣୁ ସେମାନେ ଆମର ଅତିଥି। ଆମେ କେବେ ବି ସେମାନଙ୍କୁ ଆକ୍ରମଣ କରିନାହୁଁ। ତୀର୍ଥ ଯାତ୍ରୀଙ୍କ ସହିତ ଆମର କୌଣସି ଶତ୍ରୁତା ନାହିଁ। ଆମର ଅଧିକାର ଓ ସ୍ୱାଧୀନତା ପାଇଁ ଆମେ ଲଢ଼ୁଛୁ। ଯେଉଁମାନେ ଆମକୁ ବନ୍ଧୁକ ଉଠାଇବାକୁ ବାଧ୍ୟ କରୁଛନ୍ତି ସେମାନଙ୍କ ବିରୋଧରେ ଆମେ ଯୁଦ୍ଧ କରୁଛୁ। ଭାରତୀୟଙ୍କ ବିରୋଧରେ ନୁହେଁ ଭାରତ ବିରୋଧରେ ଆମେ ଯୁଦ୍ଧ କରୁୁଛୁ। ଅବଶ୍ୟ ଏହି ଭିଡିଓର ସଠିକତାକୁ ନେଇ ପ୍ରଶ୍ନ ଉଠିଛି।
