ମୁମ୍ବଇ: ବିବାଦରେ ବଲିଉଡ଼ର ଲୋକପ୍ରିୟ କୋରିଓଗ୍ରାଫର ଫରାହ ଖାନ। ଚଳିତ ଦିନରେ ସୋନୀ ଟିଭିରେ ପ୍ରସାରିତ ‘ସେଲିବ୍ରିଟି ମାଷ୍ଟର ସେଫ୍’ ହୋଷ୍ଟ କରୁଥିବା ଫରାହ ଖାନ୍ ଶୋ’ରେ ହୋଲି ପର୍ବକୁ ନେଇ ଏମିତି କିଛି ବୟାନ ଦେଇଛନ୍ତି, ଯାହାକୁ ନେଇ ଏବେ ବିବାଦ ଦେଖାଦେଇଛି। ମାମଲା ଏତେ ଗମ୍ଭୀର ହୋଇଛି ଯେ, ତାଙ୍କ ବିରୋଧରେ ପୂର୍ବତନ ‘ବିଗ୍ବସ୍’ ପ୍ରତିଯୋଗୀ ହିନ୍ଦୁସ୍ତାନୀ ଭାଉ ହିନ୍ଦୁମାନଙ୍କ ଭାବନାକୁ କୁଠାରଘାତ କରିଥିବା ଅଭିଯୋଗ କରି ଏତଲା ଦାୟର କରିଛନ୍ତି। ଏଥିସହ ଫରାହଙ୍କ ବିରୋଧରେ ସେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଯଦି ପୁଲିସଠାରୁ ତାଙ୍କୁ ନ୍ୟାୟ ନ ମିଳେ ତେବେ ସେ ଅଦାଲତଙ୍କ ଦ୍ଵାରସ୍ଥ ହେବେ ବୋଲି କହିଛନ୍ତି ବିକାଶ ପାଠକ ଓରଫ୍ ହିନ୍ଦୁସ୍ତାନୀ ଭାଉ।
ସୂଚନାଯୋଗ୍ୟ, ‘ସେଲିବ୍ରିଟି ମାଷ୍ଟର ସେଫ୍’ର ଏକ ଭିଡିଓ ଇଣ୍ଟରନେଟ୍ରେ ଭାଇରାଲ ହୋଇଥିଲା, ଯେଉଁଥିରେ ଫରାହ କହୁଛନ୍ତି, ‘‘ଏ କଥା ମନେରଖ ଯେ, ହୋଲି ହେଉଛି ସବୁ ଛପ୍ରୀ ପୁଅମାନଙ୍କର ପର୍ବ।’’ ତାଙ୍କର ଏହି ଭିଡିଓ ସାମ୍ନାକୁ ଆସିବାପରେ ଲୋକେ ତାଙ୍କୁ ଖୁବ୍ ସମାଲୋଚନା କରିଛନ୍ତି। ସାମାଜିକ ଗଣମାଧ୍ୟମରେ ଏହାକୁ ନେଇ ଖୁବ୍ ଚର୍ଚ୍ଚା ଚାଲିଛି। ଆଉ ଏବେ ଫରାହ ଖାନଙ୍କ ଏହି ବୟାନକୁ ନେଇ ହିନ୍ଦୁସ୍ତାନୀ ଭାଉ ଅସନ୍ତୋଷ ବ୍ୟକ୍ତ କରିବାସହ ତାଙ୍କ ବିରୋଧରେ ଏତଲା ଦାୟର କରିଛନ୍ତି।
