ସମାଜ ଡିଜିଟାଲ ଡେସ୍କ: ଆଧାର କାର୍ଡ଼କୁ ମାଗଣାରେ ଅପଡେଟ୍ କରିବାର ଶେଷ ତାରିଖ ପାଖେଇ ଆସୁଛି। ଗତ ଡିସେମ୍ବର ମାସରେ ୟୁନିକ୍ ଆଇଡେଣ୍ଟିଫିକେସନ୍ ଅଥରିଟି ଅଫ୍ ଇଣ୍ଡିଆ(ୟୁଆଇଡିଏଆଇ) ଆଧାରକୁ ମାଗଣା ଅପଡେଟ୍ ପାଇଁ ସମୟସୀମା ବୃଦ୍ଧି କରିଥିଲା। ସମୟସୀମା ବୃଦ୍ଧି ପରେ ମାର୍ଚ୍ଚ ୧୪, ୨୦୨୪ ହେଉଛି ମାଗଣାରେ ଅପଡେଟ୍ କରିବାର ଶେଷ ତାରିଖ। ତେବେ ବର୍ତ୍ତମାନ ଲୋକେ କେବଳ myAadhaar ପୋର୍ଟାଲରେ ମାଗଣାରେ ସେମାନଙ୍କର ଆଧାର କାର୍ଡ ଅପଡେଟ୍ କରିପାରିବେ। ଯଦି ଆପଣ ଏହାକୁ ଅଫଲାଇନରେ ଅପଡେଟ୍ କରନ୍ତି, ତେବେ ଆପଣଙ୍କୁ ୫୦ ଟଙ୍କା ଫିସ୍ ଦେବାକୁ ପଡ଼ିବ।
ଆଧାର କାର୍ଡଧାରୀମାନେ ମାର୍ଚ୍ଚ ୧୪ ସୁଦ୍ଧା ମାଗଣାରେ ୟୁଆଇଡିଏଆଇର ୱେବସାଇଟ୍ରୁ ଆଧାର କାର୍ଡରେ ସେମାନଙ୍କର ନାମ, ଠିକଣା, ଫଟୋ ଏବଂ ଅନ୍ୟାନ୍ୟ ପରିବର୍ତ୍ତନ କରିପାରିବେ। ଅପରପକ୍ଷେ, ଯଦି ଆପଣ କମନ ସର୍ଭିସ ସେଣ୍ଟର(ସିଏସ୍ସି)କୁ ଯାଆନ୍ତି, ତେବେ ଆପଣଙ୍କ ଆଧାର କାର୍ଡର ବିବରଣୀ ଅପଡେଟ୍ କରିବା ପାଇଁ ଆପଣଙ୍କଠାରୁ ୫୦ ଟଙ୍କା ଫିସ୍ ଆଦାୟ କରାଯିବ।
ଆଧାରକୁ ଅନଲାଇନ୍ କେମିତି ଅପଡେଟ୍ କରିବେ ?
ମାଗଣାରେ ନିଜ ଆଧାର କାର୍ଡ ବିବରଣୀ ଅପଡେଟ୍ କରିବାକୁ ଏହି ସହଜ ପଦକ୍ଷେପଗୁଡ଼ିକ ଅନୁସରଣ କରନ୍ତୁ:
– ଆଧାର ନମ୍ବର ଜରିଆରେ https://myaadhaar.uidai.gov.in/ରେ ଲଗ୍ ଇନ୍ କରନ୍ତୁ।
– ‘proceed to update address’ ଅପ୍ସନ ଉପରେ କ୍ଲିକ୍ କରନ୍ତୁ।
– ଏହାପରେ ନିଜ ପଞ୍ଜୀକୃତ ମୋବାଇଲ୍ ନମ୍ବରରେ ପଠାଯାଇଥିବା ୱନ୍-ଟାଇମ୍ ପାସୱାର୍ଡ(ଓଟିପି) ଦିଅନ୍ତୁ।
– ପରବର୍ତ୍ତୀ ସମୟରେ ‘ଡକ୍ୟୁମେଣ୍ଟ୍ ଅପଡେଟ୍’ ଚୟନ କରନ୍ତୁ ଏବଂ ଏଠାରେ ଆପଣଙ୍କ ଠିକଣାର ବିବରଣୀ ଦେଖାଯିବ।
– ଏହି ବିବରଣୀଗୁଡ଼ିକ ଯାଞ୍ଚ କରନ୍ତୁ ଏବଂ ପରବର୍ତ୍ତୀ ହାଇପର ଲିଙ୍କ୍ ଉପରେ କ୍ଲିକ୍ କରନ୍ତୁ।
– ଡ୍ରପଡାଉନ୍ ତାଲିକାରୁ ଆଇଡେଣ୍ଟିଟି ପ୍ରୁଫ୍ ଏବଂ ଆଡ୍ରେସ୍ ପ୍ରୁଫ୍ ଡକ୍ୟୁମେଣ୍ଟ୍ ଚୟନ କରନ୍ତୁ ଏବଂ ଠିକଣା ଅପଲୋଡ୍ କରନ୍ତୁ।
– ଏହାପରେ ‘submit’ ଅପ୍ସନ ଉପରେ କ୍ଲିକ୍ କରନ୍ତୁ ଏବଂ ଡକ୍ୟୁମେଣ୍ଟ ଅପଲୋଡ୍ କରନ୍ତୁ।
– ଶେଷରେ ୧୪ ଅଙ୍କ ବିଶିଷ୍ଟ ଅପଡେଟ୍ ରିକ୍ଵେଷ୍ଟ ନମ୍ବର(ୟୁଆରଏନ) ସୃଷ୍ଟି ହେବା ପରେ, ଅପଡେଟ୍ ରିକ୍ଵେଷ୍ଟ ସ୍ବୀକାର କରାଯିବ।
