ବିଧାୟକଙ୍କ କାର୍ଯ୍ୟାଳୟକୁ ଆଖିବୁଜା ଗୁଳିମାଡ଼

ସମାଜ ଡିଜିଟାଲ ଡେସ୍କ: ଉତ୍ତରାଖଣ୍ଡର ହରିଦ୍ବାର ଜିଲା ଅନ୍ତର୍ଗତ ଖାନପୁର ବିଧାନସଭା ନିର୍ବାଚନମଣ୍ଡଳୀର ବିଧାୟକ ଏବଂ ପୂର୍ବତନ ବିଧାୟକଙ୍କ ମଧ୍ୟରେ ଗ୍ୟାଙ୍ଗୱାର ଆରମ୍ଭ ହୋଇଛି। ରବିବାର ବିଧାୟକ ଉମେଶ କୁମାରଙ୍କ କାର୍ଯ୍ୟାଳୟ ଉପରେ ଅଖିବୁଜା ଗୁଳିମାଡ଼ ହୋଇଛି। ବିଜେପିର ପୂର୍ବତନ ବିଧାୟକ କୁୱଁର ପ୍ରଣବ ସିଂହ ଚମ୍ପିଆନ ଓ ତାଙ୍କ ସମର୍ଥକମାନେ ୩ଟି ଗାଡ଼ିରେ ଆସି ବିଧାୟକଙ୍କ କାର୍ଯ୍ୟାଳୟ ଉପରକୁ ଆଖିବୁଜା ଗୁଳିମାଡ଼ କରିଥିଲେ। ଦିନ ଦ୍ବିପ୍ରହରରେ ଏହି ଘଟଣା ଘଟିଛି। ଏହା ପରେ ବିଧାୟକଙ୍କ କାର୍ଯ୍ୟାଳୟ ବାହାରେ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି। ଘଟଣା ସମୟରେ ବିଧାୟକ କାର୍ଯ୍ୟାଳୟରେ ଥିଲେ କି ନାହିଁ ତାହାର ସୂଚନା ମିଳିନାହିଁ।

ଗତ ଦୁଇଦିନ ଧରି ପୂର୍ବତନ ବିଧାୟକ ପ୍ରଣବ ସିଂହ ଏବଂ ବର୍ତ୍ତମାନର ବିଧାୟକ ଉମେଶଙ୍କ ମଧ୍ୟରେ ସାମାଜିକ ଗଣମାଧ୍ୟମରେ ବାକଯୁଦ୍ଧ ଜାରି ରହିଥିଲା। ଏହାକୁ ନେଇ ଗୁଳିମାଡ଼ ହୋଇଥିବା କୁହାଯାଉଛି। ଗୁଳି ଶବ୍ଦ ଶୁଣି ସ୍ଥାନୀୟ ଅଞ୍ଚଳବାସୀ ଭୟଭୀତ ହୋଇପଡ଼ିଥିଲେ। ରାସ୍ତାରେ ଯାତାୟତ କରୁଥିବା ଲୋକେ ଭୟରେ ଏଣେତେଣେ ଦୌଡ଼ିଥିଲେ।