ଗୁରୁଡିଝାଟିଆ : ରାସ୍ତାକାମ ପାଇଁ ସମସ୍ତ ନୀତି ନିୟମକୁ ଉଲ୍ଲଘଂନ କରାଯାଇ ସରକାରୀ ଜମିରୁ ବୁହା ଚାଲିଛି ମୋହରମ। ସରକାରଙ୍କ ଲକ୍ଷଲକ୍ଷ ଟଙ୍କାର ରାଜସ୍ୱ ହାନୀ ହେଉଛି। ହେଲେ ସରକାରୀ ଅଧିକାରୀଙ୍କ ନୀରବତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷରେ ବେଆଇନ ମୋହରମ ଚାଲାଣ ହେଉଥିବା ସ୍ଥାନ ସଂରକ୍ଷିତ ଜଙ୍ଗଲକୁ ଲାଗି ରହିଥିବାରୁ ବନ୍ୟପ୍ରାଣୀଙ୍କ ଜୀବନ ପ୍ରତି ବିପଦ ଦେଖାଦେଇଛି। ଏଭଳି ଚିତ୍ର ଦେଖିବାକୁ ମିଳେ କଖଡି-କପୁରସିଂ ରାସ୍ତା ପାଶ୍ୱର୍ରେ।
ପ୍ରକାଶଯୋଗ୍ୟ ରାସ୍ତା ଓ କୋଠାବାଡି ବିଭାଗ ଦ୍ୱାରା କଖଡି-କପୁରସିଂ ରାସ୍ତାର ଉନ୍ନତି ଓ ପ୍ରଶସ୍ତିକରଣ ପାଇଁ କାର୍ଯ୍ୟାଦେଶ ଦିଆଯାଇଛି। ଠିକାଦାର କେତେବେଳ ସରକାରୀ ଜମିରେ କିଛି ମୁଷ୍ଟିମେୟ ଲୋକଙ୍କୁ ଧରି ଆଖିବୁଜା ମାଟି ଉଠାଉଛି। ପୁଣି ନୀତି ନିୟକୁ ଉଲ୍ଲଘଂନ କରି ଏହି ରାସ୍ତାର ସୁବାସୀ ସଂରକ୍ଷିତ ଜଙ୍ଗଲ ପାଶ୍ୱର୍ ରାସ୍ତାକୁ ଲାଗିଥିବା ସ୍ଥାନକୁ ଖାଲ କରି ବେଆଇନ ଭାବରେ ମୋହରମ ଉଠାଯାଉଛି। ଏହାଦ୍ୱାରା ରାସ୍ତାରେ ଯାଉଥିବା ଗାଡିଚାଳକ ମୋହରମ ଉଠିଥିବା ଖାତରେ ପଡି ଦୁର୍ଘଟଣାର ଶିକାର ହେବାକୁ ଏଡାଇ ଦିଆଯାଇନପାରେ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ଏହି ଜଙ୍ଗଲରେ ହାତୀ, ହରିଣ, ବାରାହା, କୁଟୁରା ଆଦି ବିଭିନ୍ନ ବନ୍ୟପ୍ରାଣୀ ବସବାସ କରିବା ସହିତ ରାସ୍ତା ଅତିକ୍ରମ କରିଥାନ୍ତି। କେତେବେଳେ ଯେ ବନ୍ୟପ୍ରାଣୀ ବେଆଇନ ଭାବେ ଖନନ ହୋଇଥିବା ମୋହରମ ଖାତରେ ପଡି ପ୍ରାଣ ହରାଇବାକୁ ଏଡାଇ ଦିଆଯାଇନପାରେ। ଠିକାଦାରଙ୍କ ଏଭଳି କାର୍ଯ୍ୟପ୍ରତି ଜଙ୍ଗଲ ବିଭାଗ ବା ଆଠଗଡ ତହସିଲ କର୍ତ୍ତୃପକ୍ଷ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଦାବି ହୋଇଛି।
