ଇସଲାମାବାଦ: ଦେଶର ଦୟନୀୟ ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ ଓ ତାଙ୍କ କ୍ୟାବିନେଟ୍ର ସବୁ ମନ୍ତ୍ରୀ ଏଣିକି ଦରମା ଓ ଅନ୍ୟାନ୍ୟ ଭତ୍ତା ନେବେ ନାହିଁ ବୋଲି ଜଣାପଡିଛି। ଗୁରୁବାର ସରିଫଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଉପରୋକ୍ତ ନିଷ୍ପତ୍ତି ନିିଆଯାଇଛି। କେବଳ ମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ଦରମା ନୁହେଁ, ସରକାରୀ ଖର୍ଚ୍ଚରେ ଏମାନଙ୍କ ସମେତ ସାଂସଦ ଓ ସରକାରୀ ଅଧିକାରୀଙ୍କ ବିଦେଶ ଗସ୍ତ ଉପରେ ମଧ୍ୟ କଟକଣା ଲାଗୁ କରାଯାଇଛି। ବିଦେଶ ଯାତ୍ରା ଜରୁରୀ ହୋଇଥିଲେ, ସଂପୃକ୍ତ ମନ୍ତ୍ରୀ, ସାଂସଦ ଓ ଅଧିକାରୀଙ୍କୁ ଆଗୁଆ ଅନୁମତି ନେବାକୁ ପଡିବ ବୋଲି ଜଣାପଡିଛି। ଏପରିକି ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ ମଧ୍ୟ ଦରମା ନେବେନି ବୋଲି ଗତ ସପ୍ତାହରେ ଘୋଷଣା କରିସାରିଛନ୍ତି।
ସୂଚନାଯୋଗ୍ୟ, ପାକିସ୍ତାନ ରାଷ୍ଟ୍ରପତି ଦରମା ବାବଦରେ ମାସିକ ୮,୪୬,୫୫୦ ଟଙ୍କା(ପାକିସ୍ତାନୀ ମୁଦ୍ରା) ପାଇଥାନ୍ତି। ପାକିସ୍ତାନରେ ମୁଦ୍ରାସ୍ଫୀତି ଦିନକୁ ଦିନ ବୃଦ୍ଧି ପାଉଥିବାବେଳେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ମୂଲ୍ୟ ଆକାଶଛୁଆଁ ହେବାରେ ଲାଗିଛି।
