ଗୁରୁଡିଝାଟିଆ: ଅନାଥ ହୋଇ ପଡିଥିବା ନାବାଳିକାଦ୍ୱୟର ମାଆଙ୍କ ଶୁଦ୍ଧିକ୍ରିୟା ପାଇଁ ଆଠଗଡ ବିକାଶ ମଞ୍ଚ ବଢାଇଛି ସହଯୋଗର ହାତ। ମାଲଭାଇଙ୍କ ପାଇଁ ଧୋତି, ସାଇଭାଇଙ୍କ ପାଇଁ ଦଶାହ ଓ ଏକାଦଶାହ କର୍ମ ପାଇଁ ଖାଦ୍ୟ ସାମଗ୍ରୀ ଓ ଦୁଇ ଅନାଥ ଝିଅଙ୍କୁ ନୂତନବସ୍ତ୍ର ପ୍ରଦାନ କରିଛନ୍ତି। ପ୍ରକାଶଯୋଗ୍ୟ ଖୁଣ୍ଟୁଣୀ ପଞ୍ଚାୟତ ରମ୍ପେଇ ମୌଜାର କୋଳିଭୋଗରା ଗାଁ ଅନୁସୂଚିତଜାତି ସାହିର ରମେଶ ବେହେରା ରୋଗଗ୍ରସ୍ତହୋଇ ଇହଲୀଳା ସମ୍ବରଣ କରିଥିଲା। ବିଧବା ପତ୍ନୀ ପ୍ରତିମା ଦୁଇନାବାଳିକା ରଶ୍ମିତା ଓ ସୁନିତାଙ୍କୁ ମୂଲଲାଗି ପେଟରେ ଦାନା ଦେବା ସହିତ ୫ମ ଓ ୮ମଶ୍ରେଣୀରେ ପାଠ ବି ପଢାଉଥିଲେ। ହେଲେ ଗତ ୩ଦିନ ତଳେ ଅସୁସ୍ଥତା ଅନୁଭବ କରିବା ସହିତ ପ୍ରତିମାର ମଧ୍ୟ ବିୟୋଗ ଘଟିଥିଲା। ଫଳରେ ଦୁଇ ନାବାଳିକା ବାପମାଆ ଛେଉଣ୍ଡ ହୋଇ ଅସହାୟ ହୋଇପଡିଥିଲେ। ପାଖରେ କାଣିକଉଡିଟିଏ ନଥିବାରୁ ନିଜେ ତ ଖାଇବା ପାଇଁ ପାଉନାହାନ୍ତି। ମାଆର ଶୁଦ୍ଧିକ୍ରିୟା କରନ୍ତେ ବା କେମିତି?
ଏଭଳି ଦୁସ୍ଥିତିରେ ଆଠଗଡ ବିକାଶମଞ୍ଚର ସଭାପତି ସମାଜସେବୀ ମାନସ ବସ୍ତିଆ ପହଞ୍ଚିଥିଲେ ଦୁଇନାବାଳିକା ଙ୍କ ଘରେ।ଦୁଃଖର ବାଦଲ ଛିଡି ପଡିଥିବା ଦୁଇନାବାଳିକା ଝାଉଁଳି ପଡିଥିଲେ। ସମାଜସେବୀ ଶ୍ରୀ ବସ୍ତିଆ ସେମାନଙ୍କୁ ଆଶ୍ୱାସନା ଦେବା ସହିତ ସାହିଭାଇଙ୍କୁ ଡାକିଥିଲେ। ଦଶାହ ଓ ଏକାଦଶାହ କର୍ମ ଓ ମାଲଭାଇଙ୍କ ନିମନ୍ତେ ଆବଶ୍ୟକ ନୂଆ ଧୋତି,ଖାଦ୍ୟ ସାମଗ୍ରୀ ପ୍ରଭୃତି ଯୋଗାଇଦେବା ପାଇଁ ପ୍ରତିଶୃତି ଦେଇଥିଲେ। ଆଜି ପ୍ରତିଶୃତି ପୂରଣ କରିବା ପାଇଁ ଶ୍ରୀ ବସ୍ତିଆ ଦଶାହ ଓ ଏକାଦଶାହ ଶୁଦ୍ଧିକ୍ରିୟା କାର୍ଯ୍ୟ ନିମନ୍ତେ ସାହିଭାଇଙ୍କ ଖାଦ୍ୟସାମଗ୍ରୀ, ମାଲଭାଇଙ୍କ ପାଇଁ ନୂତନ ଧୋତି ଓ ଅନାଥ ଦୁଇନାବାଳିକାଙ୍କ ପାଇଁ ନୂତନ ପୋଷାକ ପ୍ରଦାନ କରିଛନ୍ତି। ଏଥିସହିତ ଦୁଇ ଅନାଥ ଭଉଣୀ ପାଠ ପଢିବା ପାଇଁ ଆବଶ୍ୟକ କଲେ ସରକାରୀ ବିଦ୍ୟାଳୟ କିମ୍ବା ଭୂବନେଶ୍ୱରର ପ୍ରତିଷ୍ଠିତ ବେସରକାରୀ ଶିକ୍ଷାନୁଷ୍ଠାନରେ ମାଗଣାରେ ଶିକ୍ଷାବ୍ୟବସ୍ଥା କରାଇ ଦେବା ପାଇଁ ପ୍ରତିଶୃତି ଦେଇଛନ୍ତି। ଆଠଗଡ ବିକାଶମଞ୍ଚର ଏଭଳି କାର୍ଯ୍ୟ ସାଧାରଣ ଜନତାଙ୍କ ହୃଦୟକୁ ଦୋହଲାଇ ଦେଇଛି।
