ଚାନ୍ଦିପୁଟ : ଗଜପତି ଜିଲ୍ଲା ମୋହନା ବ୍ଳକ ଦୁର୍ଗମାଞ୍ଚଳ ଚୁଡ଼ଙ୍ଗପୁର ପଞ୍ଚାୟତ କାର୍ଯ୍ୟାଳୟ ପରିସରରେ ଜିଲ୍ଲା ପ୍ରଶାସନ ପକ୍ଷରୁ ଗ୍ରାମ୍ୟମୁଖୀ ପ୍ରଶାସନ ଓ ସଂଯୁକ୍ତ ଜନ ଅଭିଯୋଗ ଶୁଣାଣି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି ଅଭିଯୋଗ ଶୁଣାଣିରେ ଅତିରିକ୍ତ ଜିଲ୍ଲାପାଳ ବୀରେନ୍ଦ୍ର କୁମାର ଦାସ ଓ ଏସପି ସ୍ଵାତି ଏସ କୁମାର ଯୋଗଦେଇ ଲୋକଙ୍କ ବିଭିନ୍ନ ଅଭିଯୋଗ ଶୁଣିଥିଲେ। ଏଥିରେ ସମୁଦାୟ ୯୮ ଟି ଅଭିଯୋଗ ଆସିଥିବା ବେଳେ ସେଥି ମଧ୍ୟରୁ ୨୬ ଟି ବ୍ୟକ୍ତିଗତ ଓ ୭୨ ଟି ସାମୁହିକ ଅଭିଯୋଗ ଥିଲା। ସେଥିମଧ୍ୟରୁ ୧୧ଟି ଅଭିଯୋଗର ତ୍ୱରିତ ସମାଧାନ କରାଯାଇଛି। ଚୁଡ଼ଙ୍ଗପୁର ଅଞ୍ଚଳରେ ମୋବାଇଲ ଟାୱାର ସ୍ଥାପନ, ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ନିଯୁକ୍ତି, ବିଭିନ୍ନ ଗାଁକୁ ରାସ୍ତା ନିର୍ମାଣ, ମୋହନା ବ୍ଲକର ଅନ୍ତରବା, କେଶରୀଗୁଡା, ଯୁବ, ଚୁଡ଼ଙ୍ଗପୁର ପଞ୍ଚାୟତ ସମେତ ନୂଆଗଡ ବ୍ଳକ ର କିରାମା, ଅନୁଗୁର, ସୁନ୍ଦରଡାଙ୍ଗ ଆଦି ୭ଟି ପଞ୍ଚାୟତର ଜନ ସାଧାରଣଙ୍କ ପାଇଁ ବିଦ୍ୟୁତ ସବଷ୍ଟେସନ ସ୍ଥାପନ ପାଇଁ ଅଞ୍ଚଳବାସୀ ଦାବି କରିଛନ୍ତି । ଦୀର୍ଘ ଦିନ ଧରି ଚୁଡ଼ଙ୍ଗପୁର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ପଦବୀ ଖାଲି ପଡ଼ିଥିବା ବେଳେ ଫାର୍ମାସିଷ୍ଟଙ୍କ ଦ୍ୱାରା ଚିକିତ୍ସା ଚାଲିଛି। ଏହି ସ୍ୱାସ୍ଥ୍ୟ କେନ୍ଦ୍ର ପରିଚାଳନା ପାଇଁ ବେସରକାରୀ ସଂସ୍ଥାକୁ ଦେବାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଥିଲା। ତେବେ ସୋମବାର ଅଭିଯୋଗ ପରେ ସିଡିଏମଓ ଏହାକୁ ପ୍ରତ୍ୟାହୃତ କରିଛନ୍ତି। ଏହା ସହ ସରକାରୀସ୍ତରରେ ପରିଚାଳିତ ହେବ ବୋଲି ସେ ସ୍ପଷ୍ଟ କରିଛନ୍ତି। ଏହି ପରିପ୍ରେକ୍ଷୀରେ ବିଭାଗୀୟ ଅଧିକାରୀ ଖୁବ ଶୀଘ୍ର ବିଦ୍ୟୁତ ସବଷ୍ଟେସନ ସ୍ଥାପନ କରାଯିବା ପାଇଁ ପଦକ୍ଷେପ ନେବେ ବୋଲି କହିଛନ୍ତି। ଏହି ଅଭିଯୋଗ ଶୁଣାଣି ଅବସରରେ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ୧୧ ଜଣକୁ ୪୩ ହଜାର ଟଙ୍କା ପ୍ରଦାନ କରାଯାଇଛି। ଏଥିରେ ଏବିଡିଓ ରମାକାନ୍ତ ଚୌଧୁରୀ, ସିଡିଏମଓ ଡ଼. ପ୍ରଦୀପ ପାତ୍ର, ସରପଞ୍ଚ କେଶନୀ ଗମାଙ୍ଗ ପ୍ରମୁଖଙ୍କ ସମେତ ବହୁ ବିଭାଗୀୟ ଅଧିକାରୀ ମାନେ ଉପସ୍ଥିତ ଥିଲେ।
Popular Categories
Previous article
Next article