ଗୋପାଳପୁର: ଗୋପାଳପୁର ଥାନା ଅନ୍ତର୍ଗତ ବିକ୍ରମପୁର ଗ୍ରାମରେ ଆଜି ଅପରାହ୍ନରେ ଏକ ଅଭାବନୀୟ ଘଟଣା କ୍ରମରେ ସେପଟିକ ଟ୍ୟାଙ୍କର ସେଣ୍ଟ୍ରିଙ୍ଗ ବାହାର କରିବାକୁ ଯାଇ ଜଣେ ମିସ୍ତ୍ରୀ ସମେତ ତାଙ୍କୁ ଉଦ୍ଧାର କରିବାକୁ ଯାଇ ସ୍ଥାନୀୟ ଅଞ୍ଚଳର ଅନ୍ୟ ଦୁଇଜଣ ଗ୍ରାମବାସୀଙ୍କ ଶ୍ୱାସରୁଦ୍ଧ ହୋଇ ଦୁଃଖଦ ମୃତ୍ୟୁ ଘଟିଥିବା ଜଣାପଡିଛି। ମୃତକମାନେ ହେଲେ ବିକ୍ରମପୁର ଗ୍ରାମର ମିସ୍ତ୍ରୀ ଏମ. ସଦାନନ୍ଦମ ରେଡ୍ଡୀ (୪୨) ଓ ଦୁଇ ଗ୍ରାମବାସୀ ବି କ୍ରିଷ୍ଣା ରେଡ୍ଡୀ (୫୨) ଓ ତାରେଣେୟା ରେଡ୍ଡୀ ବୋଲି ଜଣାପଡିଛି।
ବିକ୍ରମପୁର ଗ୍ରାମରେ ପି.ସିଦ୍ଧେଶ୍ବର ରେଡ୍ଡୀଙ୍କ ଘର କାମରେ ସଦାନନ୍ଦମ ମିସ୍ତ୍ରୀ ଭାବେ କାମ କରୁଥିଲେ। ଘର ସମ୍ମୁଖରେ ନିର୍ମିତ ହୋଇଥିବା ସେପଟିକ ଟ୍ୟାଙ୍କର ସେଣ୍ଟ୍ରିଙ୍ଗ୍ ବାହାର କରିବା ନିମନ୍ତେ ସଦାନନ୍ଦମ ଅପରାହ୍ନ ସାଢେ଼ ୫ଟା ବେଳେ ସେପଟିକ ଟ୍ୟାଙ୍କ ଭିତରେ ଓହ୍ଲାଇ ଥିଲେ। କିନ୍ତୁ ଦୀର୍ଘ ସମୟ ଧରି ବାହାରକୁ ନ ବାହାରିବାରୁ ସେଠାରେ ଥିବା ଶ୍ରମିକମାନେ ହୋହାଲ୍ଲା କରିଥିଲେ।ଏହା ଦେଖି ସିଦ୍ଧେଶ୍ୱରଙ୍କ ପଡୋଶୀ ଥିବା କ୍ରିଷ୍ଣା ଓ ତାରଣେୟା ଜଣେ ପରେ ଜଣେ ଭିତରକୁ ଯାଇ ବାହାରକୁ ବାହାରିନଥିଲେ।ଏହି ଘଟଣାକୁ ନେଇ ଅନ୍ୟମାନେ ଘଟଣାସ୍ଥଳରେ ପହଞ୍ଚି ଅଚେତ ଅବସ୍ଥାରେ ତିନିଜଣଙ୍କୁ ବାହାରକୁ କାଡିବା ପରେ ତୁରନ୍ତ ବ୍ରହ୍ମପୁର ବଡ ମେଡିକାଲ ନେଇଥିଲେ ସୁଦ୍ଧା ସେଠାରେ ଡ୍ୟୁଟିରେ ଥିବା ଡ଼ାକ୍ତର ଡଃ ଆଦିତ୍ୟ ନାରାୟଣ ଦାସ ମୃତ ଘୋଷଣା କରିଥିଲେ। ଘଟଣାକୁ ନେଇ ଗ୍ରାମରେ ଶୋକର ଛାୟା ଖେଳିଯାଇଛି। ଘଟଣା ପରେ ସ୍ଥାନୀୟ କରାପଲ୍ଲୀ ସରପଞ୍ଚଙ୍କ ପ୍ରତିନିଧି ଏସ ଧର୍ମରାଜ ରେଡ୍ଡୀ ଘଟଣା ସ୍ଥଳ ସମେତ ବ୍ରହ୍ମପୁର ବଡ ମେଡିକାଲ ରେ ରହି ସହଯୋଗ କରିଥିଲେ।
