ଗୋପାଳପୁର: ବ୍ରହ୍ମପୁର ପ୍ରସାରଭାରତୀ ଆକାଶବାଣୀ କେନ୍ଦ୍ର ଦ୍ଵାରା ପ୍ରସ୍ତୁତ ଏ.ଆଇ.ଆର୍ ନେକ୍ସେଟ୍ କାର୍ଯ୍ୟକ୍ରମରେ ବ୍ରହ୍ମପୁର ବିଶ୍ବବିଦ୍ୟାଳୟର ଛାତ୍ରଛାତ୍ରୀ ଯୋଗ ଦେଇଛନ୍ତି। ଏଥିରେ ଉପସ୍ଥାପକ ଭାବେ ରେଡିଓ ଜକି ଶିବାନନ୍ଦ ବାରିକ ଓ ରଶ୍ମିତା କୁମାରୀ ଦଳାଇ ଉପସ୍ଥାପକ ଭାବେ ଉପସ୍ଥିତ ରହି କାର୍ଯ୍ୟକ୍ରମକୁ ପରିଚାଳନା କରିଥିଲେ। ଏହାର ଆଲୋଚ୍ୟ ପ୍ରସଙ୍ଗଟି ଥିଲା ‘ନିଶାମୁକ୍ତ ସମାଜ’। ଏହାର ଉତ୍ପତ୍ତି, କାରଣ, ନିରାକରଣ ତଥା ନିଶାର ନିବାରଣ ଓ ସାମାଜିକ ଜୀବନରେ ତା’ର କୁ ପ୍ରଭାବ ସହ ଏଥିରେ ମହିଳାମାନଙ୍କ ପ୍ରମୁଖ ଭୂମିକା ଓ ସଚେତନତା କ’ଣ ରହିଛି ବା ଆଗକୁ କ’ଣ ରହିବା ଦରକାର ଏସବୁକୁ ଆଲୋଚନା ପରିସର ଭୁକ୍ତ କରି ସମସ୍ତେ ନିଜ ନିଜର ସୁଚିନ୍ତିତ ମତାମତ ରଖିଥିଲେ।
ଏଥିରେ ଆମନ୍ତ୍ରିତ ଭାବେ ବ୍ରହ୍ମପୁର ବିଶ୍ବବିଦ୍ୟାଳୟର ବୈଦ୍ୟୁତିକ ବିଜ୍ଞାନ ଓ ପ୍ରଯୁକ୍ତି ବିଦ୍ୟା ବିଭାଗ ସ୍ନାତକୋତ୍ତର ପ୍ରଥମ ବର୍ଷର ଛାତ୍ର ତଥା ଯୁବ କବି ଯୁବ ସମାଜସେବୀ ଏନ୍.ନୀଳମାଧବ ପାତ୍ର, ସାମ୍ବାଦିକତା ଓ ଗଣ ଯୋଗାଯୋଗ ବିଭାଗର ପ୍ରଭାତୀ ସାହୁ, ମନିଷା ବିଶ୍ଵାଳ, ସତ୍ୟପ୍ରକାଶ ନାୟକ, ପ୍ରଭାତ ସାହୁ ଓ ଅର୍ଥନୀତି ବିଭାଗର ଚିରଞ୍ଜିବି ବାଡତ୍ୟା, ଅଭିନ୍ନ ସୁନ୍ଦର ପାଢି ପ୍ରମୁଖ ଛାତ୍ରଛାତ୍ରୀ ଯୋଗ ଦେଇଥିଲେ। ବ୍ରହ୍ମପୁର ଆକାଶବାଣୀ କେନ୍ଦ୍ର ତରଫରୁ ଏହା କୁହାଯାଇଛି କି, ଏହି ଏ.ଆଇ.ଆର୍ ନେକ୍ସେଟ୍ ସମ୍ବେଦନଶୀଳ ସାମାଜିକ ପରିସ୍ଥିତି ଉପରେ ଆଧାରିତ ବିଷୟକୁ ଆଲୋଚନା ପରିସରକୁ ଆଣିଥାଏ ଏବଂ ଏଭଳି କାର୍ଯ୍ୟକ୍ରମ କରିବାରେ ଏହି କେନ୍ଦ୍ର ମଧ୍ୟ ହେଉଛି ପ୍ରଥମ। ଆଜି ଥିଲା ଏହାର ଦ୍ଵିତୀୟ କାର୍ଯ୍ୟକ୍ରମ। ଏହାକୁ ଆଜି ଅପ୍ରେଲ ୧୦ ତାରିଖ ରାତି ଠିକ୍ ୯ ଟା ବେଳେ ବ୍ରହ୍ମପୁର ପ୍ରସାର ଭାରତୀ ଆକାଶବାଣୀ କେନ୍ଦ୍ରରୁ ୧୦୦.୬ ଏଫ୍ ଏମ ଯୋଗେ ସିଧା ପ୍ରସାରଣ ହେବ। ଶେଷରେ ଛାତ୍ରଛାତ୍ରୀମାନେ ଆକାଶବାଣୀ କେନ୍ଦ୍ରକୁ ଏଭଳି ସୁଯୋଗ ପ୍ରଦାନ ପାଇଁ କୃତଜ୍ଞତା ଜଣାଇବା ସମସ୍ତେ ଶୁଣିବା ପାଇଁ ଅନୁରୋଧ କରିଛନ୍ତି।
