ସମାଜ ଡିଜିଟାଲ ଡେସ୍କ: ଭାରତର ୟୁପିଆଇ ପେମେଣ୍ଟ ଆପ୍ Google Payରେ ଏକ ବଡ଼ ପରିବର୍ତ୍ତନ ହେବାକୁ ଯାଉଛି। ଉପଭୋକ୍ତାମାନଙ୍କ ସୁବିଧା ପାଇଁ ଭଏସ୍ ଫିଚର ଆଣିବ ଗୁଗଲ୍ ପେ। ଗୁଗଲ ପେ’ର ଲିଡ୍ ପ୍ରଡକ୍ଟ ମ୍ୟାନେଜମେଣ୍ଟ ଶରଥ ବୁଲୁସୁଙ୍କ କହିବାନୁଯାୟୀ, ଗୁଗଲ୍ ପେ’ର ନୂଆ ଭଏସ୍ ଫିଚର ଦ୍ଵାରା ଅନଲାଇନ୍ ପେମେଣ୍ଟ କରିବା ସହଜ ହୋଇଯିବ। ତେବେ ଏହି ଭଏସ୍ ଫିଚର କିପରି କାମ କରିବ ସେ ବିଷୟରେ ଅଧିକ ସୂଚନା ଦିଆଯାଇ ନାହିଁ। କିନ୍ତୁ ଅନୁମାନ କରାଯାଉଛି ଯେ, ହୁଏତ କଥା କହି ଅନଲାଇନ୍ ପେମେଣ୍ଟ କରାଯାଇପାରିବ। ଯଦି ଏପରି ହୁଏ, ତେବେ ଭାରତ ପାଇଁ ଏହା ଏକ ଗେମ୍ ଚେଞ୍ଜିଂ ଫିଚର ହୋଇପାରେ, କାରଣ ଭାରତରେ ଭିନ୍ନ ଭିନ୍ନ ଭାଷାର ଲୋକ ଅଛନ୍ତି। ଏମିତି ଅନେକ ଲୋକ ମଧ୍ୟ ଅଛନ୍ତି, ଯେଉଁମାନେ ଲେଖା ପଢା ଜାଣି ନାହାନ୍ତି।
ରିପୋର୍ଟ ଅନୁସାରେ GPay ଖୁବଶୀଘ୍ର ଭଏସ୍ ଫିଚର ଲଞ୍ଚ୍ କରିବ। ତେବେ କମ୍ପାନୀ ଲଞ୍ଚ୍ ତାରିଖ ଘୋଷଣା କରିନାହିଁ। ଗୁଗଲ୍ ପେ’ କହିଛି ଯେ, ସେମାନେ ଭାରତ ସରକାରଙ୍କ Bhasini ଭଳି ପ୍ରୋଜେକ୍ଟଗୁଡ଼ିକ ସହିତ କାମ କରୁଛନ୍ତି, ଯାହା ଲୋକମାନଙ୍କୁ ସ୍ଥାନୀୟ ଭାଷାରେ ପେମେଣ୍ଟ କରିବାରେ ସାହାଯ୍ୟ କରିବ। ଗୁଗଲ୍ ପେ’ ଆହୁରି କହିଛି ଯେ, ମେସିନ୍ ଲର୍ଣ୍ଣିଂ ଏବଂ ଏଆଇ ଉପରେ କମ୍ପାନୀ ଲଗାତର କାର୍ଯ୍ୟ କରୁଛି। କମ୍ପାନୀର କହିବାକଥା, ଏଆଇ ଏବଂ ମେସିନ୍ ଲର୍ଣ୍ଣିଂ ସାହାଯ୍ୟରେ ଏହା ଅନଲାଇନ୍ ଠକେଇ ଏବଂ ଧମକକୁ ରୋକିବାରେ ସାହାଯ୍ୟ ମିଳିପାରିବ।
