ଆକାଶରୁ ଅଜବ ଭାବେ ମାଛ ବର୍ଷା, ଏସିଡ୍ ବର୍ଷା ଆଦି ହେବାର ଶୁଣିଥିବେ । ଭାବନ୍ତୁ ତ, ଯଦି ଆକାଶରୁ ସୁନା ଭଳି ମୂଲ୍ୟବାନ୍ ଦ୍ରବ୍ୟର ବର୍ଷା ହୁଏ- ତେବେ ସେହି ଅଞ୍ଚଳରେ କିପରି ପରିସ୍ଥିତି ସୃଷ୍ଟି ହେବ ।
ରୁଷ୍ର ସବୁଠାରୁ ଥଣ୍ଡା ସହର ୟାକୁତ୍ସରେ ହଠାତ୍ ଆକାଶରୁ ସୁନାଖଣ୍ଡମାନ ଖସିବାରେ ଲାଗିଲା । ଲୋକେ ତତ୍କ୍ଷଣାତ କିଛି ବୁଝିପାରିଲେ ନାହିଁ । କିନ୍ତୁ ବୁଝିବାମାତ୍ରେ ଆଖିବୁଜା ଗୋଟାଇବାରେ ଲାଗିପଡିଲେ । ସେଗୁଡିକ ପୁଣି ଛୋଟ ନୁହେଁ, ବଡବଡ ବେଶ୍ ଓଜନିଆ ସୁନାଖଣ୍ଡ ଥିଲା ।
ଏ ଖବର ତୁରନ୍ତ ସେହି ଅଞ୍ଚଳ ସାରା ବ୍ୟାପିଗଲା। ସହରର ପୁଲିସ୍ ସକ୍ରିୟ ହୋଇ ଇମର୍ଜେନ୍ସି ସର୍ଚ୍ଚ ଅପରେସନ୍ ଆରମ୍ଭ କରିଦେଲା ଏବଂ ସମଗ୍ର ଅଞ୍ଚଳ ସିଲ୍ କରିଦିଆଗଲା ।
ଖବର ନେବାରେ ଜଣାପଡିଲା ଯେ ୟାକୁତ୍ସ ବିମାନ ବନ୍ଦରରୁ ଏକ କାର୍ଗୋ ବିମାନ ୩ହଜାର କିଲୋଗ୍ରାମ ସୁନା ନେଇ କେଉଁଆଡେ ଯାଉଥିଲା । ଏକ ସୁନା କମ୍ପାନୀ ଖଣିରୁ ସୁନା ବାହାର କରିବା ପରେ ଏହାକୁ ଫିନିସିଂ ପାଇଁ ପଠାଉଥିବା ବେଳେ ଏଥିରେ ସୁନା ସହିତ ଶହଶହ କୋଟି ଟଙ୍କାର ହୀରା ବି ରହିଥିବା କୁହାଯାଉଛି । ତେବେ ଉଡାଣ କରିବାର କିଛି ସମୟ ପରେ ହିଁ ବିମାନର ନିମ୍ନଭାଗରେ ଥିବା ଗେଟ୍ଟି ଭାଙ୍ଗିଯାଇଥିଲା ଏବଂ ସୁନା ସବୁ ଖସିବାରେ ଲାଗିଲା ।
ଗଣମାଧ୍ୟମର ରିପୋର୍ଟ ଅନୁସାରେ, ଉଡାଣ ଆରମ୍ଭ କରିବା ପରେ ପାଇଲଟ୍ ବିମାନରେ ସୃଷ୍ଟି ହୋଇଥିବା ସମସ୍ୟା ସମ୍ପର୍କରେ ଜାଣିପାରି ଜରୁରୀକାଳୀନ ଅବତରଣ କରାଇବାକୁ ନିଷ୍ପତ୍ତି ନେଲେ । ତେବେ ଏହି ସମୟ ମଧ୍ୟରେ ବିମାନଟି ରନ୍ୱେରୁ ୨୬କିଲୋମିଟର ଯାଏ ସୁନା ଖସାଇ ସାରିଥିଲା । ବିମାନଟି ଯେଉଁ ବାଟ ଦେଇ ଯାଇଥିଲା, ପୁଲିସ୍ ରନ୍ୱେରୁ ରାଜପଥ ପର୍ୟ୍ୟନ୍ତ ସେସବୁ ବାଟ ସିଲ୍ କରି ସୁନା ଫେରିବା ପ୍ରୟାସରେ ଲାଗିଥିବା ଜଣାଯାଇଛି ।
