ପାଟଣାଗଡ଼: ବଲାଙ୍ଗିର ଜିଲା ପାଟଣାଗଡ଼ ବ୍ଲକ ଅନ୍ତର୍ଗତ ବାଲିପଟା ଗ୍ରାମର ଝାଙ୍କରପଡ଼ାରେ ଝାଡ଼ାବାନ୍ତି ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଛି। ୨୮ରେ ଗ୍ରାମର ଜୟନ୍ତୀ ବାଗ(୪୮)ଙ୍କ ମୃତ୍ୟୁ ହୋଇଥିବାବେଳେ ଶୁକ୍ରବାର ସକାଳେ ପ୍ରଫୁଲ୍ଲ ସାହୁ(୬୫)ଙ୍କ ଚିକିତ୍ସାଧୀନ ଅବସ୍ଥାରେ ପାଟଣାଗଡ଼ ଡାକ୍ତରଖାନାରେ ମୃତ୍ୟୁ ହୋଇଥିବା ଜଣାପଡ଼ିଛି। ଘସିଏନ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଏକ ଡାକ୍ତରୀ ଦଳ ଗାଁରେ ପହଞ୍ଚି ଚିକିତ୍ସା ଆରମ୍ଭ କରିଥିବା ସହ ଲୋକଙ୍କୁ ସଚେତନ କରୁଛନ୍ତି।
ବାଲିପଟା ଗ୍ରାମର ଝାଙ୍କରପଡ଼ାରେ ଗତ କିଛି ଦିନ ଧରି ଝାଡ଼ାବାନ୍ତି ଲାଗି ରହିଛି। ପଡ଼ାର ଅନିତ ମାଝୀ(୪୮), ମଦନ ହରିପାଲ(୭୦), କ୍ଷୀରସିନ୍ଧୁ ବାଗ(୨୩), ରଚନା ଦଣ୍ଡସେନା (୨୦), ଶାନ୍ତି ମାଝୀ (୦୩), ଲକ୍ଷ୍ମଣ ବରିହା(୫୬), ପ୍ରୀତି ବରିହା(୧୪), ପଦ୍ମିନୀ ମାଝୀ(୫୭) ଏବଂ ସୁଧିର ବରିହା(୪୩)ଙ୍କ ଅବସ୍ଥା ଗୁରୁତର ରହିଛି। ପଡ଼ାର ଅଧିକାଂଶ ଘରେ ଝାଡ଼ାବାନ୍ତି ଲାଗି ରହିଥିବା ଜଣାପଡ଼ିଛି।
ଘସିଏନ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଡାକ୍ତରୀ ଦଳ, ଆଶା ଓ ଅଙ୍ଗନବାଡ଼ି କର୍ମୀ ଆକ୍ରାନ୍ତଙ୍କୁ ଚିକିତ୍ସା ଯୋଗାଇ ଦେବା ସହ ଘର ଘର ବୁଲି ବୁଲି ସାବୁନରେ ହାତ ଧୋଇବା ସହ ପାଣିକୁ ଫୁଟାଇବାକୁ ଲୋକଙ୍କୁ ବୁଝାଇଛନ୍ତି। ଏହାବ୍ୟତୀତ ଗ୍ରାମ୍ୟ ଜଣ ଯୋଗାଣ ବିଭାଗ ପକ୍ଷରୁ ଏକ ଦଳ ଗାଁରେ ପହଞ୍ଚି ସମସ୍ତ ନଳକୂପ ଓ କୂଅରେ ବ୍ଲିଚିଂ ପକାଇ ବିଶୋଧନ କରିଥିବା ଜଣାଯାଇଛି। ଗାଁରେ ସ୍ୱାସ୍ଥ୍ୟ ବିଭାଗ ପକ୍ଷରୁ ଏକ ଅସ୍ଥାୟୀ ଶିବିର ଖୋଲାଯାଇଥିବା ବେଳେ ସନ୍ଧ୍ୟା ପ୍ରାୟ ୮ ଘଣ୍ଟା ସମୟରେ ପାଟଣାଗଡ଼ ଗୋଷ୍ଠୀ ଉନ୍ନୟନ ଅଧିକାରୀ ସୁମନ ମିଞ୍ଜ ଗାଁରେ ପହଞ୍ଚି ସ୍ଥିତି ଅନୁଧ୍ୟାନ କରୁଛନ୍ତି।
ବଲାଙ୍ଗିର ଜିଲା ମୁଖ୍ୟ ଚିକିତ୍ସାଧିକାରୀ ଡା.ପ୍ରଦୀପ ଗୁରୁ କହିଛନ୍ତି ଯେ ପ୍ରଫୁଲ୍ଲଙ୍କ ହୃଦ୍ଘାତରେ ମୃତ୍ୟୁ ହୋଇଥିବାବେଳେ ଝାଡ଼ାବାନ୍ତିରେ ଆକ୍ରାନ୍ତ ହୋଇ ଜୟନ୍ତୀଙ୍କ ମୃତ୍ୟୁ ହୋଇଛି।
Comments are closed.