ସମାଜ ଡିଜିଟାଲ ଡେସ୍କ: କଂଗ୍ରେସ ସାଂସଦ ତଥା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ମିଥ୍ୟା ଏବଂ ରାଜନୈତିକ ଅପପ୍ରଚାର ଭାରତର ମର୍ଯ୍ୟାଦାକୁ ବିଦେଶରେ ନଷ୍ଟ କରୁଛି। ଏଭଳି କହି ରାହୁଲଙ୍କୁ କଡ଼ା ଶବ୍ଦରେ ସମାଲୋଚନା କରିଛନ୍ତି ବୈଦେଶିକ ମନ୍ତ୍ରୀ ଏସ. ଜୟଶଙ୍କର। ସୋମବାର ରାହୁଲ କହିଥିଲେ ଯେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ଉତ୍ସବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୋଗଦେବା ଲାଗି ନିମନ୍ତ୍ରଣ ପତ୍ର ଆଣିବା ସକାଶେ ବିଦେଶ ମନ୍ତ୍ରୀ ଜୟଶଙ୍କର ଆମେରିକା ଗସ୍ତ କରିଥିଲେ। ରାହୁଲଙ୍କ ଏହି ମନ୍ତବ୍ୟ ପରେ ଜୟଶଙ୍କର ସାମାଜିକ ଗଣମାଧ୍ୟମ ଏକ୍ସ’ରେ ଏକ ପୋଷ୍ଟ କରି ରାହୁଲ ମିଥ୍ୟା ପ୍ରଚାର କରୁଥିବା କହିଛନ୍ତି। ସେ ଲେଖିଛନ୍ତି, ବିରୋଧୀ ଦଳ ନେତା ରାହୁଲ ଗାନ୍ଧୀ ବାରମ୍ବାର ତାଙ୍କ ଆମେରିକା ଗସ୍ତ ସମ୍ପର୍କରେ ମିଥ୍ୟା ପ୍ରଚାର କରୁଛନ୍ତି। ସେ ଆମେରିକାର ପରରାଷ୍ଟ୍ର ସଚିବ ଏବଂ ବାଇଡେନ ପ୍ରଶାସନର ଜାତୀୟ ସୁରକ୍ଷା ପରାମର୍ଶଦାତା (ଏନଏସଏ)ଙ୍କୁ ଭେଟିବା ଲାଗି ଯାଇଥିଲେ। ମୋଦୀଙ୍କୁ ଆମନ୍ତ୍ରଣ ଲାଗି କୌଣସି ପ୍ରକାର ଆଲୋଚନା ହୋଇନାହିଁ। ଆମ ପ୍ରଧାନମନ୍ତ୍ରୀ ସାଧାରଣତଃ ଏପରି କାର୍ଯ୍ୟକ୍ରମରେ ଯୋଗଦିଅନ୍ତି ନାହିଁ। ରାହୁଲଙ୍କ ମିଥ୍ୟା ରାଜନୈତିକ ଉଦ୍ଦେଶ୍ୟପ୍ରଣୋଦିତ ହୋଇଥାଇପାରେ, କିନ୍ତୁ ତାହା ଭାରତର ମର୍ଯ୍ୟାଦାକୁ ବିଦେଶରେ କ୍ଷୁଣ୍ଣ କରୁଛି ବୋଲି ଜୟଶଙ୍କର ଲେଖିଛନ୍ତି।
Comments are closed.